बाहुनडाँगी । यही आउँदो नयाँ वर्ष बैशाख १ गतेका दिन ‘‘अब धनगढी दौडिन्छ’ को छैठौ संस्करण हाफ म्याराथन दौड प्रतियोगिता आयोजना हुने भएको छ ।
धनगढीमा शनिबार आयोजक धनगढी जेसीजजले पत्रकार सम्मेलनको आयोजना गरेर उक्त कुराको जानकारी दिएको हो ।
प्रतियोगिताका संयोजक लोकराज भट्टले प्रत्येक वर्ष झै यो वर्षपनि हाफ म्याराथन प्रतियोगिता आयोजना गरिने बताए । उनले धनगढी रंगशालाबाट शुरु हुने दौडा प्रतियोगिता २१ दशमलव १ किलोमिटरको हुने बताए ।
प्रतियोगितामा तिन ओटा विधाहरु समावेश गरेको संयोजक भट्टले जानकारी दिए । उनले २१ दशमलव १ किलोमिटरको खुला दौड, ५ किलोमिटरको कर्पोरेट र संचार त्यस्तै ५ किलोमिटरकै ट्राईसाकल रेस आयोजना गरिने बताए ।
दौड प्रतियोगितामा खुलातर्फ प्रथम हुनेले ५५ हजार ५ सय ५५ रुपैया, दोस्रो ३३ हजार ३ सय ३३ र तेस्रो हुनेले २२ हजार २ सय २२ रुपैया, कर्पोरेट र संचार तर्फ प्रथम, द्वितिय र तेस्रो हुनेले क्रमशः ५ हजार ५ सय ५५, ३ हजार ३ सय ३३ र २ हजार २ सय २२ रुपैया पुरस्कार पाउने आयोजक धनगढी जेसिजका अध्यक्ष नरेन्द्रराज अवस्थिले जानकारी दिए ।
