विवेक मिश्र
बेलबारी ११ चैत सवारी दुर्घटनालाई न्युनीकरण गर्ने उदेश्यका साथ सोमवार मोरङको बेलबारी १० भाउन्नेमा एक कार्यक्रम आयोजना गरी ट्रिपर चालकलाई टाईम कार्ड बितरण गरिएको छ । बढ्दो सवारी दुर्घटना न्युनिकरणका लागी पहिलो चरणमा ट्रिपरलाई टाईम कार्ड बितरण गरिएको प्रदेश नम्बर १ ट्राफिक प्रहरी कार्यलयका प्रहरी नायब उपरिक्षक बेदप्रसाद गौतमले बताए । ट्रिपरमा जवान चालकहरु बढी रहेको,भत्ताको लोभमा तिब्र गतिमा ट्रिपर चलाउने गरेको र मादकपदार्थ सेवनका कारण बढी दुर्घटना हुने गरेको भन्दै उनले टाईम कार्ड बितरण गरिएपछि दुर्घटना न्युनीकरण हुने बताए । टाईम कार्ड लागु भएपछि निर्धारित दुरीमा निर्धारित समयमा सवारी नचलाए पहिलो पटक सम्झाउने र दोस्रो पटक कार्वाही गरिने समेत उनले बताए ।
यसअघि प्रदेश नम्बर १ ट्राफिक प्रहरीले बिहान १ घण्टा र बेलुका १ घण्टा ट्रिपर सञ्चालनमा लगाएको रोक तत्कालका लागी यथावत रहने र सोही नियम अनुसार चल्न चालकहरुलाई उनले निर्देशन समेत दिएका छन । कार्यक्रममा जिल्ला ट्राफिक प्रहरी कार्यलय मोरङका प्रमुख शिवकुमार पोख्रेलले टाईम कार्ड शुरु भएपछि चालकहरु सचेत हुने र दुर्घटनामा कमी आउने बिश्वास ब्यक्त गरे ।
उनले चालकहरुको लापरबाहीका कारण नै धेरै दुर्घटना भएको भन्दै अब टाईम कार्ड अनुसार सवारी चलाए दुर्घटना न्युनीकरणमा मद्धत पुग्ने उनले बताए । ट्रिपर ब्यबसायी महासंघका अध्यक्ष गोपाल कार्कीले ट्रिपरका कारण मात्र दुर्घटना हुने नभएको भन्दै उनले ट्रिपर मात्र बढी निशानामा पर्ने गरेको बताए । जिल्ला ट्राफिक प्रहरी कार्यलय मोरङको आयोजनामा भएको कार्यक्रम बेलबारी १० का वडाध्यक्ष गंगा याख्खाको सभापतित्वमा कार्यक्रम भएको ट्राफिक प्रहरी कार्यलय बेलबारीका प्रमुख लिलाकुमार श्रेष्ठले जानकारी दिएका छन् ।
