बेलबारी । मोरङको बेलबारी ४ की २६ बर्षिया रमिला राईको हत्या भएको २७ दिनपछि अन्तिम संस्कार गरिएको छ । बेतना सिमसार नजिकै देवीथान सामुदायिक वन क्षेत्र स्थित तिनपैनीमा बिहिबार रमिलाको शव दाहसंस्कार गरिएको हो ।
नेकपा बेलबारीका नेता योगेन्द्र गुरुङ द्वारा हत्या भएको २६ दिन पछि बुधबार कोसीमा फेला परेको रमिलाको शव धरान स्थित विपि कोइराला स्वास्थ्य विज्ञान प्रतिष्ठानमा बिहिबार नै पोष्टमार्टम भएको थियो । बुधबार कोसीमा फेला परेको शव प्रतिष्ठान लगेर शव गृहमा राखिएको थियो । प्रतिष्ठानमै गएको रमिलाको आफन्तको टोलीले पोष्टमार्टम पछि शव बुझेको थियो ।
नेकपाका नेता गुरुङले हत्या गरेर कोसी नदीमा शव फालेको भनेर प्रहरीलाई वयान दिएदेखि नै प्रहरीले शव खोजी कार्य जारी राखेको थियो । गएको फागुन १७ गतेदेखि हराएकी रमिलाको खोजी गर्दा पनि नभेटिएपछि प्रहरीले योगेन्द्र गुरुङलाई पक्राउ गरेको थियो । पक्राउ परेका गुरुङले हत्या गरेर शव फालेको बताएका थिए ।
