विराटनगर, १७ चैत
राष्ट्रिय समाचार समिति (रासस)को पथरी समाचारदाता गोपाल पोखरेल पत्रकार कल्याण कोष मोरङको ३३औँ वार्षिकोत्सवका अवसरमा आज पुरस्कृत हुनुभएको छ । पोखरेल रु १५ हजार राशिको ‘उदीयमान पुरस्कार–२०७५’बाट पुरस्कृत हुनुभएको हो ।
यसैगरी रु ३५ हजार राशिको ‘सिर्जनशील पत्रकारिता पुरस्कार–२०७५’बाट पत्रकार अनन्तराज न्यौपाने पुरस्कृत हुनुभएको छ । उहाँहरुलाई विराटनगर महानगरपालिकाका प्रमुख भीम पराजुलीले दोसल्ला ओढाएर प्रमाणपत्र प्रदान गर्नुभयो ।
सो अवसरमा प्रमुख पराजुलीले पत्रकार कल्याण कोष मोरङलाई रु तीन लाख दिने वचनबद्धता व्यक्त गर्नुभयो । पत्रकार कल्याण कोष मोरङका अध्यक्ष प्रह्लाद साहले पत्रकारिता क्षेत्रको विकास र वृद्धिका लागि कोष सदैव तत्पर रहने बताउनुभयो । सो अवसरमा पत्रकार महासङ्घ प्रदेश नं १ का अध्यक्ष विक्रम लुईंटेल, मोरङ अध्यक्ष बन्धु पोखरेल, राससका पूर्वक्षेत्रीय प्रमुख हेमराज रेग्मीलगायतले संस्थाले गरेको कार्यको प्रशंसा गर्नुभएको थियो । कोषले मोरङलाई कार्य क्षेत्र बनाई कार्यरत पत्रकारलाई बर्सेनी पुरस्कार प्रदान गर्दै आएको छ ।
