काठमाडौँ, ४ वैशाख । नेपाल कम्युनिस्ट पार्टीले भोलि (वैशाख ५ गते) बिहीबारको नेपाल बन्द सफल पार्न आम जनसमुदायलाई अपिल गरेको छ ।
यस बिषयमा उक्त पार्टीको केन्द्रीय कार्यालयद्वारा प्रकाशित अपिलमा भनिएको छ, ‘केपी ओलीसरकारले प्रतिबन्ध लगाएको प्रति गम्भिर ध्यानाकर्षण जनाइएको छ ।
सुदर्शन कमरेडलगायतको रिहाइ, झूट्टा मुद्दा खारेजी, सारा भ्रष्टाचार, तस्करी, राष्ट्रघातका विरुद्ध बाध्य भई यही वैशाख ५ गते नेपाल बन्द गरेका छौँ, विज्ञप्तीमा भनिएको छ ।
उक्त दिन सबै कलकारखाना, शैक्षिक संस्था, यातायात, व्यापार व्यवसाय बन्द गरौँ । अनैतिक फासिवादी सरकारलाई राजनीतिक मार्गमा तान्न प्रयत्न गरौँ ।’
अपिलमा अगाडि भनिएको छ, ‘अधकचल्टो क्रान्तिले केही व्यक्ति र नेताहरूलाई सत्ताभोगी लुटेरा वर्गमा पतन गरिदिन्छ । जनयुद्धलाई हामी यसबाट बचाउन चाहन्थ्यौँ । पुँजीवाद—दलाल पुँजीवाद रहेसम्म न जनता मुक्त हुनेछन्, न त सुखी र समृद्ध नै हुनेछन् ।
