हेटौंडा, ५ वैशाख । विप्लव समूहले नेपाल बन्द आह्वान गरेका बेला आज बिहानै मकवानपुरमा दुईवटा गाडी जलाइएका छन् । गाडी अज्ञात समूहले जलाएको प्रहरीले जनाएको छ । पालुङबाट कुखुरा बोकेर हेटौंडातर्फ आउँदै गरेको ना २ च ९०९४ नम्बरको गाडी थाहा नगरपालिका–४ स्थित पानारोमा रिसोर्टअगाडि तीनजनाको समूहले रोकेर आगजनी गरेको प्रहरीले जनाएको छ ।
त्यस्तै, भीमफेदी गाउँपालिका–९ मा तरकारी बोक्ने ना ४ ख ७९०६ नम्बरको गाडी पनि जलाइएको छ । आगजनीको जिम्मा अहिलेसम्म कसैले पनि लिएका छैनन् । विप्लव नेतृत्वको नेकपा समूहले आफ्नो पार्टीमाथि लगाइएको प्रतिबन्ध र नेता–कार्यकर्ता पक्राउको विरोधमा बन्द आह्वान गरेकाले आगजनीमा यही समूहको संलग्नता हुन सक्ने प्रहरीको अनुमान छ ।
