विराटनगर, ८ चैत विद्युतीय कारोबार ऐनको दफा ४७ र ४८ खारेज गर्नुपर्ने र स्वतन्त्र प्रेसमाथिको हस्तक्षेप बन्द गर्नुपर्नेसहितका १३ बुँदे अन्तु घोषणापत्र पारित गर्दै नेपाल पत्रकार महासंघ १ नं. प्रदेशको साधारणसभा सम्पन्न भएको छ ।
इलामको सुर्योदय नगरपालिकास्थित श्रीअन्तुमा पूर्वप्रधानमन्त्री झलनाथ खनालले उद्घाटन गर्नुभएको साधारणसभाको बन्दसत्रले संविधानले ज्ञारेन्टी गरेको पूर्ण प्रेसस्वतन्त्रताको प्रतिकुल समाचार लेखेकै आधारमा पत्रकारहरु पक्राउ पर्नु खेदजनक रहेको ठहर गरेको हो ।
साधारणसभाले तीनै तहका सरकारहरुले प्रेस स्वतन्त्रता विरोधी कानून निर्माण गर्न नहुने, मुलुकी देवानी तथा फौजदारी संहिताका प्रेस स्वतन्त्रता विरोधी प्रावधान सच्चाउनुपर्ने, पत्रकारिताको नियमन गर्न एउटै एकीकृत कानून निर्माण गर्नुपर्ने, मिडियाको अनुगमन, दर्ता, नविकरण, नियमन र सेवा सुविधा प्रदान गर्ने काम प्रदेश तहबाट हुनुपर्ने प्रस्तावसमेत गरेको छ । साधारणसभाले श्रमजीवी पत्रकार ऐन कार्यान्वयन गर्न र साना लगानीका सञ्चार माध्यमको संरक्षणको लागि समानुपातिक विज्ञापन नीति लागू गर्नसमेत माग गरेको छ ।
यसैगरी लामो समयदेखि रोकिएको लोककल्याणकारी विज्ञापन वापतको रकम तत्काल भुक्तान गर्न, सञ्चार माध्यमलाई सेवामूलक उद्योगको मान्यता दिलाउन पनि साधारणसभाले माग गरेको छ । साधारणसभाले प्रदेश र स्थानीय सरकारका विज्ञापनहरु सोही क्षेत्रका सञ्चारमाध्यमले प्राप्त गर्ने नीति निर्माणमा पनि प्रदेश सरकारको ध्यानाकर्षण गराएको छ ।
साधारणसभाले पत्रकार महासंघको सदस्यता वितरण र नविकरणमा पनि कडाई गर्ने प्रस्ताव पारित गरेको छ । पत्रकारिताम सक्रिय नरहेका वा अन्य पेशा व्यवसाय गर्ने, निर्वाचित भएका जनप्रतिनिधि, वर्षभरी समाचारसँग कतैपनि नजोडिनेहरु, पत्रकार महासंघका कुनैपनि गतिबिधिमा सहभागी नहुने र विदेशमा रहेकाहरुको सदस्यता खारेज गर्ने प्रस्ताव पारित गरेको छ । यस्तै सरकारी तथा निजामती सेवामा रहेकाहरुलाई पनि महासंघबाट विदा दिने निर्णय लिएको छ । नयाँ सदस्यता वितरणमा पनि सक्रिय पत्रकारहरुले मात्र सदस्यता प्राप्त गर्नेगरी मौखिक, लिखित, प्रयोगात्मक परिक्षा वा सार्वजनिक सुनुवाई गरेर मात्र नयाँ सदस्यताको सिफारिस गर्न शाखाहरुलाई निर्देशन दिएको छ ।
साधारणसभामा महासचिब विवेक गौतमले प्रस्तुत गरेको सांगठनिक प्रतिवेदन र कोषाध्यक्ष अम्बिका भण्डारीले पेश गरेको आर्थिक प्रतिवेदनसमेत पारित गरेको छ ।
नेपाल पत्रकार महासंघ प्रदेश नं. १ को २०७६ वैशाख ६ र ७ गते इलाम सूर्योदय नगरपालिस्थित श्रीअन्तुमा भएको साधारणसभाबाट पारित विषेश प्रस्तावहरुः
१. यो साधारणसभा लोकतन्त्र, नागरिक स्वतन्त्रता, प्रेस तथा अभिव्यक्ति स्वतन्त्रताका निम्ति कसैसँग सम्झौता नगरिकन संघर्ष गर्न दृढ संकल्प गर्दछ ।
२. नेपालको संविधान विपरित विद्युतीय कारोबार ऐनका नाममा पत्रकार पक्राउ गर्ने, थुन्ने, कारबाही गर्नेजस्ता कार्य भएकाले तत्काल यस्तो कार्य वन्द गरि सो ऐनको दफा ४७ र ४८ अबिलम्ब खारेज गर्न यो साधारणसभा जोडदार माग गर्दछ ।
३. अनलाइन सञ्चार माध्यम नवीकरण र दर्ता गर्दा झन्झटिलो, अव्यवहारिक र अंकुस लगाउने प्रकृतिको भएकाले गर्दा सरल तरिकाबाट नविकरणको व्यवस्था गर्न यो साधारणसभा माग गर्दछ ।
४. यो साधारणसभा स्थानीय निकायको विज्ञापन स्थानीय सञ्चार माध्यमलाई भन्ने मान्यतालाई स्वीकार गरि प्रदेश र जिल्ला तहमा नेपाल पत्रकार महासंघको संलग्नतामा विज्ञापन प्राधिकरण वा त्यस्तो कुनै निकाय निर्माण गरि समान रुपमा सबै सञ्चार माध्यमलाई विज्ञापन वितरणको व्यवस्था गर्न र साना लगानीका सञ्चार माध्यमको प्रबद्र्धनमा योगदान गर्न सरकारको ध्यानाकर्षण गराउँदछ ।
५.यो साधारणसभा श्रमजीवी पत्रकार ऐन दुई दसक अघिदेखि कार्यान्वयन हुन नसकेकाले गर्दा यो ऐन संशोधन गरि स्वरोजगारमूललक र ठूला लगानीका सञ्चार माध्यमको वर्गीकरण गरि वस्तुगत अवस्था विश्लेषणसहित ऐन कार्यान्वयन गराउन सरकारसँग माग गर्दछ ।
६. यो साधारणसभा सञ्चार सम्बन्धी सबै काम गर्नका लागि प्रदेशस्तरीय मिडिया काउन्सिलसहितका संरचना निर्माण गर्न प्रदेश सरकारसँग माग गर्दछ ।
७. पत्रकार आचारसहितालाई कडाईका रुपमा कार्यान्वयन गर्न र आचारसंहिता उल्लंघन गर्नेलाई कारबाही गर्न प्रदेश समितिलाई सो साधारणसभा निर्देश गर्दछ ।
८. यो साधारणसभा पत्रकार महासंघको विधान, निर्देशिका र केन्द्रीय साधारणसभाको निर्णय अनुसार पत्रकारितामा निस्क्रिय रहेका, राजनीतिक दलको पूर्णकालिन कार्यकर्ता रहेका, पत्रकारिता पेशा छाडेर अन्य पेशा र व्यवसायमा लागेका, वैदेशिक रोजगारीमा गएका, जनप्रतिनिधि भएका र निजामती तथा सरकारी सेवामा आबद्ध रहेकाको सदस्यता खारेज गर्न वा नविकरणमा रोक लगाउन निर्देश गर्दछ ।
९.महासंघको नयाँ सदस्यताको सिफारिस गर्र्दा आवश्यक कागजातसहित सैद्धान्तिक, प्रयोगात्मक तथा सार्वजनिक सुनुवाई गर्न शाखाहरुलाई निर्देश गर्दछ ।
१०. यो साधारणसभा महासंघका संरचनाहरुको भौतिक पूर्वाधार विकास तथा पत्रकारहरुको क्षमता अभिवृद्धिका निम्ति समानुपातिक ढंगले सहयोग गर्न प्रदेश सरकार र स्थानीय सरकारसँग माग गर्दछ ।
११. संविधानमा व्यवस्था भए अनुसार सबै सञ्चार माध्यम र पत्रकार सम्बद्ध संस्थाहरुलाई समावेसी बनाउन यो साधारणसभा आग्रह गर्दछ ।
१२.प्रेस स्वतन्त्रता, सूचनाको हक एवम् नागरिक अभिव्यक्ति स्वतन्त्रता सुरक्षित र सुनिश्चित गर्न एकीकृत आमसंचार कानून निर्माण गर्न तथा सबैखाले कानून निर्माण गर्दा सञ्चारमैत्री बनाउन यो साधारणसभा जोडदार माग गर्दछ ।
१३. सो साधरणसभा नेपालकै प्रसिद्ध पर्यटकीय स्थल इलाम सूर्योदय नगरपालिकाको श्रीअन्तुको प्रबद्र्धन र विकासमा सहयोग गर्न प्रदेश सरकार र संघीय सरकारसँग आग्रह गर्दछ । यस क्षेत्रको प्रचारप्रसारका लागि योगदान पु¥याउन प्रदेश नं. १ का सबै सञ्चारकर्मीलाई आग्रहसमेत गर्दछ ।
अन्त्यमा साधारणसभा सम्पन्न गर्नका लागि भूमिका निर्वाह गर्ने इलाम शाखा र सहभागी पत्रकारलाई बसोबासको व्यवस्था मिलाउने अन्तुडाँडा सामूदायिक होमस्टे, साधारणसभालाई सफल बनाउन सहयोग गर्ने प्रदेश सरकार, सुर्योदय नगरपालिका, इलाम नगरपालिकासहित सबैमा हार्दिक आभार प्रकट गर्दछ ।
