काठमाडौं । बालुवाटारस्थित ललितानिवासले चर्चेको सरकारी जग्गा व्यक्तिका नाममा पु¥याउने ग्राण्ड डिजाइनर प्रमुख सत्तारुढ दल नेकपामा महासचिव विष्णु पौडेल रहेको खुलेको छ ।
तत्कालिन एमाले नेता माधवकुमार नेपाल प्रधानमन्त्री भएको वेलामा पौडेलले सेटिङ मिलाएको निकटस्थ स्रोत बताउँछ । उनले जग्गा दललाहरुलाई पार्टीलाई चार करोड दिलाउने र आफुलाई ८ आना जग्गा दिन सहमत बनाएर मन्त्रीपरिषदबाट निर्णय गराएका त्यसवेलाका एक सचिवले बताए ।
अहिले तिनै पौडेलले ललिता निवास हड्पेको अभियोगमा छानबिन सुरु भएपछि एक दर्जनभन्दा बढी आरोपितलाई भगाएका छन् ।
अख्तियार दुरुपयोग अनुसन्धान आयोग र नेपाल प्रहरीको केन्द्रीय अनुसन्धान ब्युरो (सिआइबी) ले अनुसन्धान थालेपछि डिल्लीबजार मालपोत कार्यालयका तत्कालीन कर्मचारी र भूमाफियाको समूह फरार भएका हुन ।
राजनीतिक नेता, मन्त्रिपरिषद्का सदस्य, मन्त्रालयका सचिव, मालपोतका कर्मचारी, व्यापारी र भूमाफियाको मिलेमतोमा ललितानिवास र त्यसले चर्चेको करिब एक सय १४ रोपनी जग्गा हडपिएको थियो । हडप्नेमध्ये मुख्य योजनाकार डा. शोभाकान्त ढकाल र रामकुमार सुवेदीको परिवार नै फरार भयो ।
डा. शोभाकान्त, उनकी पत्नी उमा तथा छोरा सन्दीप मोबाइल नम्बर बन्द गरेर उनीहरू भागेका छन् । रामकुमारसहित उनकी पत्नी माधवी र छोरा विवेककुमार पनि भागेका छन् ।
मालपोत कार्यालय डिल्लीबजारका तत्कालीन प्रमुख मालपोत अधिकृतहरू कलाधर देउजा, टीकाराम घिमिरे, मालपोत अधिकृत हुपेन्द्रमणि केसी तथा उनीहरूलाई सघाउने अन्य कर्मचारी पनि भागेको ब्युरो स्रोतले बताएको छ ।
ललिता निवासको जग्गा हिनामिनामा निधन भइसकेका दुई पूर्वप्रधानमन्त्री कृष्णप्रसाद भट्टराई र गिरिजाप्रसाद कोइरालासहित माधवकुमार नेपाल र बाबुराम भट्टराई नेतृत्वका मन्त्रिपरिषद् निर्णय प्रमुख कारण रहेको छानबिन समितिको प्रतिवेदनमा उल्लेख छ ।
तत्कालीन मन्त्रिपरिषद्का विवादास्पद सबै निर्णय खारेज गरेर ललिता निवास सरकारकै नाममा फिर्ता ल्याउन पनि समितिले सिफारिस गरिसकेको छ ।
मन्त्रिपरिषद्बाट निर्णय हुनुअघि तत्कालीन मुख्यसचिव माधव घिमिरे (हाल निधन), अख्तियारकै प्रमुख आयुक्तबाट अवकाश पाएका तत्कालीन भौतिक योजना तथा निर्माण मन्त्रालयका सचिव दीपबहादुर बस्न्यात, चुनावी मन्त्रिपरिषद्को सदस्यसमेत रहेका तत्कालीन भूमिसुधार तथा व्यवस्था मन्त्रालयका सचिव छविराज पन्त, गृह मन्त्रालयका तत्कालीन सहसचिव, हालका निर्वाचन आयुक्त सुधीरकुमार शाहलगायतले ललितानिवासको जग्गा हडप्ने योजनाअनुसार निर्णय गराएका थिए । अभियान टाइम्सका साथमा
