काठमाडौं- प्रधानमन्त्री तथा नेकपा अध्यक्ष केपी शर्मा ओलीले बालुवाटारको जग्गा प्रकरणमा मुछिएका आफ्ना पार्टीका महासचिव विष्णु पौडेलको बचाउ गरेका छन्।
प्रधानमन्त्रीले राजाको शासनको बेलामा किनिएको जग्गाको विषयमा अहिले लाञ्छना लगाउनु उचित नहुने बताए। 'उहाँले आफ्नो पदको दूरुपयोग गरेर बालुवाटारको जग्गा किन्नुभएको होइन', मंगलबार संसदीय दलको बैठकमा ओलीले भने।
उनले महासचिवमाथिको लाञ्छना पार्टी र सरकार विरुद्धकै आक्रमणको रुपमा अर्थ्याएको एक सांसदले बताए।
'हडपिएको सरकारी जग्गा सरकारले फिर्ता ल्याउँछ', प्रधानमन्त्रीले दाबी गरे।
बालुवाटारस्थित ललिता निवाससँग जोडिएको आठ आना सरकारी जग्गा नेकपा महासचिव पौडेलका छोरा नवीनको नाममा पुगेपछि उनी आलोचित हुँदै आएका छन्।
यद्यपि, उनले दुई पटक विज्ञप्ति निकालेर आफ्नो बचाउ गरिसकेका छन्।
