विराटनगर, २३ बैशाख । विराटनगरबाट प्रदेशको राजधानी सार्न लागिएको भन्दै आजबाट विराटनगरमा अनिश्चितकालीन बन्द आह्वान गरिएको छ । विराटनगरमा बन्दको प्रभाव परेको छ । नगरका अधिकांश शैक्षिक संस्था बन्द गरिएको छ भने सडकमा सवारी साधन ठप्प पारिएको छ । बजार पसल पनि बन्द छन् । बन्दकर्ताहरु चोक चोकमा बसेर बिरोध प्रदर्शन गर्दै छन् ।
प्रदेश नम्बर एकको राजधानी विराटनगर रहने तर कार्यपालिका र व्यवस्थापिका भने बृहत विराट क्षेत्र अन्तर्गतका निकायहरुमा रहने गरि प्रदेश सभामा आईतबार दर्ता भएको प्रस्तावको बिरोधमा सोमबारबाट अनिश्चितकालीन विराटनगर बन्दको आह्वान गरिएको हो । आईतबार बसेको सर्वपक्षीय भेलाबाट सम्पुर्ण संरचना सहित विराटनगर लाई राजधानी तोक्न माग गर्दै भेषप्रसाद धमलाको नेतृत्वमा राजधानी दबाब समिति समेत गठन गरिएको छ । समितीमा नेकपा, कांग्रेस, राजपा, राप्रपा, संघिय समाजवादी फोरम लगायतका दल सह संयोजकका रुपमा छन् ।
