काठमाडौं । पूर्वी नेपालको ठूलो शहर विराटनगरलाई प्रदेश नम्बर १ को राजधानी बनाइएको छ । सो प्रदेशको एकमात्र महानगर रहेको विराटनगरलाई प्रदेशसभाको सोमबारको बैठकले राजधानी बनाउने निर्णय सर्वसम्मत गरेको हो ।
सत्तारुढ दल नेकपाको प्रस्तावलाई प्रतिपक्षी दल काँग्रेसले समर्थन् दिएपछि सर्वसम्मत राजधानी तोकिएको हो ।
तर, विराटनगर राजधानी बनाउने विषयमा असन्तुष्ट रहेका ६ जना प्रदेशसभा सदस्यहरु भने बैठकामा नै आएनन् । ९२ मध्ये ८६ जना प्रदेशसभा सदस्यहरु यो महत्वपूर्ण निर्णय गर्दा बैठकमा उपस्थित रहेका थिए ।
विराटनगरलाई स्थायी राजधानी तोकिए पनि विराट क्षेत्रको अवधारणा अनुसार संसद र कार्यपालिकाका कतिपय संरचना इटहरी र गोठगाउँसमेतलाई समेटेर बनाइने प्रस्ताव नेकपाले संसदमा लगेको थियो ।
प्रदेशको स्थायी राजधानी पारित भए पनि प्रदेशको नाम भने तय भएको छैन । नाम तय नगरी सोमबारदेखि प्रदेश अधिवेशन अन्त्य भएको छ ।
प्रदेशको राजधानी धनकुटा वा धरान हुनुपर्ने भन्दै नेकपा र कांग्रेसका केही सांसदहरुले माग गर्दै आएका थिए । अन्ततः उनीहरु पनि विराटनगरलाई राजधानी मान्ने प्रस्तावमा सहमत भएका छन् ।
यता विराटगरबासीहरुले विराटनगरमै सबै प्रशासनिक संरचनाहरु राख्नुपर्ने माग गर्दै सोमबार विराटनगर बन्दको समेत घोषणा गरेका थिए ।
