देबु बानियाँ
बाहुनडागी । एरिया ए को अप्रिल महिनामा बेलबारी जेसीजले उत्कृष्ट अवार्ड प्राप्त गरेको छ ।
नेपाल जेसीजले हरेक महिना प्रदान गर्ने जेसीज अफ द मन्थको अवार्ड अन्तर्गत बेलबारी जेसीजले एरिया ‘ए’ कै उत्कृष्ट शाखा बन्दै अवार्ड प्राप्त गरेको हो । नेपाल जेसीजले शाखाहरुको कार्य सम्पादनको आधारमा यो अवार्ड प्रदान गर्दै आएको छ । नेपाल जेसीजले आइतवार सार्वजनिक गरेको अप्रिल महिनाको अवार्ड एरिया ए बाट बेलबारीले पाउन सफल भएको हो ।
मोरङ जिल्लाको बेलबारीलाई कार्य क्षेत्र बनाएर सामाजिक अभियानमा निरन्तर क्रियाशील यो शाखाले युवाहरुको व्यक्तित्व र नेतृत्व विकासमा महत्वपूर्ण भूमिका निर्वाह गर्दै आएको छ ।
नेपाल जेसीजका राष्ट्रिय अध्यक्ष सिनेटर महेश पौडेलले क्षेत्र ‘क’ बाट उत्कृष्ट शाखाको रुपमा बेलबारी जेसीज छनोट भइ उत्कृष्ट शाखा अवार्ड प्राप्त गरेको बताउनु भएको छ ।
शाखाले उत्कृष्ट अवार्ड प्राप्त गरेपछि शाखाका अध्यक्ष दीपेन्द्र खुलालले नेपाल जेसीज तथा राष्ट्रिय अध्यक्ष सिनेटर महेश पौडेल, निरुपित कार्यकारीणी उपाध्यक्ष रविन पोखरेल ढाकाल र निरुपित उपाध्यक्ष सुमनकृष्ण श्रेष्ठलाई धन्यवाद व्यक्त गर्नु भयो । साथै उहाँले शाखाका सबै पूर्व अध्यक्ष तथा सदस्यहरुलाई समेत धन्यवाद व्यक्त गर्नु भयो ।
