काठमाडौं । भ्रष्टाचार आरोप लागेका अख्तियार दुरुपयोग अनुसन्धान आयोगका तत्कालिन आयुक्त राजनारायण पाठक ७८ लाख धरौटी बुझाएर रिहा भएका छन् ।
विशेष अदालतल काठमाडौंले बुधबार थुनछेक बहसपछि उनीमाथि बिगोअनुसारकै ७८ लाख धरौटीमा रिहा गर्न आदेश दिएको थियो । पाठकलाई नेपाल बंगलादेश बैंकले बैंक ग्यारेण्टी दिएपछि उनी बुधबारै रिहा भएको विशेष अदालत काठमाडौंले जनाएको छ ।
विशेष अदालतका अध्यक्ष बाबुराम रेग्मी तथा सदस्यहरु द्वारिकामान जोशी र प्रमोदकुमार श्रेष्ठ वैद्यको इजलासले बिगोअनुसराकै धरौटी मागेको हो । उनीमाथि अख्तियार दुरुपयोग अनुसन्धान आयोगले ७८ लाख रुपैयाँ बिगो कायम गरेर मुद्दा दायर गरेको थियो ।
७८ लाख रुपौयाँ घुस लिएको भिडियो सार्वजनिक भएपछि राजीनामा दिएका अख्तियार दुरुपयोग अनुसन्धान आयोगका तत्कालीन आयुक्त पाठक बुधबार विशेष अदालतमा उपस्थित भएका थिए । थुनछेक बहसपछि उनलाई अदालतले धरौटीमा रिहा गर्न आदेश दिएको हो ।
उनीसँगै प्रतिवादी बनाइएका लम्बोदन न्यौपाने भने फरार छन्। अख्तियारले पाठकविरुद्ध घुस लिएको अभियोगमा चैत १२ मा विशेष अदालतमा भ्रष्टाचार विरुद्ध मुद्दा दायर गरेको थियो।
