पाँचथर। मिक्लाजुङ ३ आरुबोटेमा भएको ९ जनाको हत्यामा संलग्न भएको आशंका गरिएका मानबहादुर माखिम झुण्डिएको अवस्थामा मृत फेला परेपछि घटना थप रहस्यमय भएको छ। देशैभरका आम सर्वसाधारणको दैनिकी शुरु भएसँगै फैलिएको हत्याको खबरले मंगलवार विहानैदेखि चर्चा पाइरहेको थियो। यहि चर्चामा ससुराली र साँढ दाजुको वंशै सकाउने गरि ९ जनाको हत्याको आशंका गरिएका व्यक्ति माखिम समेत मृत भेटिएपछि स्थिति जटिल बनेको हो।
यहि जटिलतालाई चिर्न नेपाल प्रहरीले आफ्नो विशेषज्ञ टोली घटनास्थल पठाएको छ। काठमाण्डौबाट पठाइएको सिआईबीको बिशेष टोली पाँचथर आइपुगेको छ। टोलीले घटनास्थलको स्थलगत जाँचबुँझ गरेपछि शव उठाइएको छ।
शवलाइ पोष्टमार्टमको लागी बिपी कोइराला स्वास्थ बिज्ञान प्रतिष्ठान लगिएको घटनास्थलमा रहेका पत्रकार सरोज शर्माले जानकारी दिए । अहिले आरुबोटेमा भएको ९ वटा शव र मिक्लाजुङ ८ लुमाङदिनमा झुण्डिएको अवस्थामा भेटिएका मानबहादुर माखिमको शव मिक्लाजुङ गाउँपालिकाको केन्द्र रविमा भेला पारेर पोष्टमार्टमका लागि धरान लैजाने तयारी भएको जिल्ला प्रहरी कार्यालय पाँचथरका प्रहरी नायव उपरिक्षक नरेन्द्र कुँवरले जानकारी दिए।
मिक्लाजुङ ३ आरुबोटेमा गए राती ९ जनाको हत्या भएको हो। मिक्लाजुङ ३ आरुबोटेको वडा कार्यलय छेउमा सो घटना भएको हो । धनराज शेर्माको ५ जना परिवार र बमकुमार फियाकको ४ जनाको हत्या भएको हो।
हत्या गरिएकाहरुमा ३६ वर्षीया जस्मिता फियाक, ४१ वर्षीय धनराज शेर्मा, २६ वर्षीया मनकुमारी फियाक, ६ वर्षीया इक्सा शेर्मा, १३ वर्षीया योवना शेर्मा, ८ वर्षीया मुना शेर्मा, ७४ वर्षीय बमबहादुर फियाक, पुर्सिकुमारी फियाक बमबहादुरकी श्रीमती र १२ वर्षीया आशिका खजुम लिम्बूको विभत्स हत्या भएको हो । १२ वर्षीया सीता खजुम भने भागेर बाँच्न सफल भएकी छन् । उनी घाइते छिन् ।
९ जनाको विभत्स हत्यामा ज्वाइँ र साढुभाइ पर्ने मानबहादुर माखिमकै संलग्नता रहेको हुनसक्ने प्रारम्भिक निष्कर्ष प्रहरीले निकालेको छ । ९ जनाको हत्या भएको घटनामा संलग्न रहेको भनी आशंका गरिएका माखिम घरभन्दा झण्डै दुई घण्टाको पैदल दूरीमा पर्ने लिम्बा गाउँमा रुखमा झुण्डिएको अवस्थामा मृत फेला परेका हुन्।
मानबहादुरको शव घटनास्थल भन्दा २ घन्टा टाढा रहेको मिक्लाजुङ ७ लिम्बामा एक रुखमा झुन्डीएको अवस्थामा फेला परेको थियो । उनको शव रहेको स्थान नजिकै रगत पोतिएको अवस्थामा खुकरी र रगत लतपतिएकै कपडाहरु भेटिदा उनैले हत्या गरेका हुन कि भनेर आशंका गरिएको छ। यद्यपी यसबारेमा थप अनुसन्धान प्रहरीले शुरु गरेको छ।
