काठमाडौँ – किरात समुदायका राई, लिम्बू, याक्खा र सुनुवार जातिको महान पर्व उभौलीको आज समापन भएको छ। यस अवसरमा किरात राई यायोक्खा, किरात याक्थुङ चुम्लुङ, किरात याक्खा छुम्मा र सुनुवार सेवा समाजले टुँडीखेलमा सांस्कृतिक कार्यक्रम आयोजना गरेको थियो।
वैशाखे पूर्णिमाका दिन शुरु भएको उभौली पर्वको आज नाचगानसहित समापन गरिएको हो। खेतीबाली लगाउने बेला भएकाले प्रकृति र पितृहरुसँग आशिर्वाद माग्दै मनाइने उभौली किरातहरुको दोस्रो ठुलो पर्व हो। यस पर्वमा अन्नबाली सप्रियोस्, प्राकृतिक प्रकोपहरुबाट बाँचियोस् भन्ने कामना गरिन्छ। परम्परागत वेषभुषामा सजिएर टुँडीखेलमा भेला भएका किरात तथा अन्य समुदायका मानिसहरुले आज साकेला र च्याभ्रुङ नाच्दै उभौलीको समापन गरे।
