पाँचथर – जिल्लाको हिलिहाङ गाउँपालिकामा एक युवतीको विभत्स हत्या गरिएको छ ।
मंगलबार दिउँसो हिलिहाङ गाउँपालिका–६ रातमाटेमा २० वर्षीया युवती सुजाता तामाङको घाँटी रेटेर हत्या गरिएको अवस्थामा शव भेटिएको हो ।
गोपेटारस्थित एनएमबी माइक्रोफाइनान्समा कार्यरत सुजाताको शव हत्या गरेर भीरबाट लडाएको अवस्थामा स्थानीयले भेटेपछि प्रहरीलाई खबर गरेका थिए ।
माइक्रोफाइनान्सको ब्याज उठाउन गाउँ पुगेर फर्किदै गर्दा उनको हत्या भएको आशंका प्रहरीले गरेको छ । बाटोमा छाता, लेडिज ब्याग र भीरमा विभत्स अवस्थामा शव देखेपछि स्थानीयले प्रहरीलाई खबर गरेका थिए ।
स्थानीयले खबर गरेलगत्तै जोरपोखरी प्रहरी कार्यालयको टोली घटनास्थलमा पुगेको थियो । जिल्ला प्रहरी कार्यालय पाँचथरबाट प्रहरी नायव उपरीक्षक (डीएसपी) नरेन्द्र कुँवर नेतृत्वको टोली पनि घटनास्थल पुगेको छ ।
डीएसपी कुँवरका अनुसार घटनाको अनुसन्धान भइरहेको छ । फाइनान्सको लगानीको ब्याज उठाएर फर्किएकी तामाङको साथबाट नगद लुटिएको हुनसक्ने अनुमान गरिएको आशंका रहेको डीएसपी कुँवरले बताए ।
यसअघि बैशाख २९ गते हिलिहाङ–४ की १५ वर्षीया शीतल योङहाङको घाँटी रेटी हत्या भएको थियो । एकपछि अर्काे हत्या घटना सार्वजनिक हुन थालेपछि सर्वसाधारण त्रासमा छन् ।
