आज शुक्रबारबाट दुई नेपाली चलचित्र ‘आप्पा’ र ‘कीर्तिपुरः द लिजेन्ट अफ कीर्तिलक्ष्मी’ हलहरुमा प्रदर्शन भएको छ । दुई नयाँ फरक जनराका चलचित्र मुलुकभर प्रदर्शनमा आएका छन् ।
‘कीर्तिपुरः द लिजेन्ट अफ कीर्तिलक्ष्मी’:
फोकस पिक्चर्सको ब्यानरमा निर्माण भएको चलचित्रलाई प्रदीप खड्गीले निर्देशन गरेका छन् भने प्रेम खड्गी र अनन्त श्रेष्ठले मिलेर निर्माण गरेका छन् । चलचित्रमा विरेन्द्र ताम्राकार कार्यकारी निर्मातामा रहेका छन् । शंकर महर्जन र नविन जोशीले चलचित्रको छायांकन गरेका हुन् । चलचित्रमा हिसिला महर्जन, यशराज गराच, मदनदास श्रेष्ठ, सुशिल राजोपाध्याय, लक्ष्मी गिरी, सूरवीर पण्डित लगायत कलाकारको अभिनय रहेको छ । ५ वर्षअघि देखि नै निर्माण थालिएको यो चलचित्र लामो समयको प्रतिक्षापछि दर्शकमाझ आउन लागेको हो । साहित्यकार बासु पासाद्वारा लिखित ‘भैरवसिंह’ नामक उपन्यासमा आधारित चलचित्र ‘कीर्तिपुर’ विगत ८ वर्ष देखिको अध्ययन र सम्बन्धित व्यक्तित्वसगको समन्वयमा निर्माण गरिएको हो । पछिल्लो समयमा उत्कृष्ट ऐतिहासिक चलचित्र निर्माण गर्न भिज्यूअल इफेक्ट अनिवार्य प्रायः छ । तत्कालिन अवस्थाको पुरानै शैली यो चलचित्रमा प्रस्तुत गर्ने काम विदेशी अंग्रेजी चलचित्रमा आवद्ध भएर काम गर्दै आउनु भएका भीएफएक्स सुपरभाइजर सन्तोष केसीले गर्नुभएको छ ।
‘आप्पा’:
अ माउन्टेन स्टोरीज प्रोडक्सन र सिनेमा आर्टको संयुक्त ब्यानरमा निर्माण भएको चलचित्रलाई अनमोल गुरुङले निर्देशन गरेका छन् भने रुदेन सादा लेप्चाले लगानी गरेकी छिन् । चलचित्रमा निर्देशक अनमोल गुरुङको कथा, अनमोल गुरुङ र उमेश उपमाको पटकथा तथा संवाद, शैलेन्द्र डि कार्कीको छायाँकन, अनमोल गुरुङ र शैकात देवको संगीत, निमेष श्रेष्ठको सम्पादन रहेको छ । चलचित्रमा दयाहाङ राई, सिद्धान्त राज तामाङ र अल्लोना काबो लेप्चाको साथमा बरिष्ठ निर्देशक तथा निर्माता तुलसी घिमिरे, अरुणा कार्की लगायत कलाकारको पनि मुख्य भुमिका रहेको छ । बाबु छोराको सम्बन्धको कथा बोल्ने चलचित्रका कार्यकारी निर्माता माबो चेम्जोङ्ग हुन् ।
