मेचीनगर । मेची नेत्रालय काँकरभिट्टा फुटबल ट्रेनिङ मेचीनगर ५ मा जारी अन्तर क्लब फुटबल प्रतियोगिताको फाइनलमा प्रवेश गरेको छ ।
क्षितिज युवा क्लबको आयोजनामा जारी प्रतियोगिताको शुक्रवार सम्पन्न अन्तिम सेमीफाइनल खेलमा वासा एफसी फुटबल क्लब चन्द्रगढीलाई ३–२ को गोल अन्तरले हराउँदै सेन्टरले फाइनलको यात्रा तय गरेको हो । सेन्टरले २३ गते सोमवार हुने फाइनल खेलमा गाडागल्ली फुटबल क्लबसँग उपाधीका लागि प्रतिस्पर्धा गर्नेछ । जितका लागि सेन्टरका तर्फबाट मिलन राईले २ र खमिरगिल्सन कन्दङ्वाले १ गोल गरेका थिए । चन्द्रगढीका तर्फबाट श्याम मुर्मु र सविन मगरले गोल गरेका थिए । खेलको म्यान अफ द म्याच चन्द्रगढीका सविन मगर भए । उनलाई आयोजक क्लबका अध्यक्ष सन्तोष गिरी र मुख्य प्रायोजक विकास लावतीले ट्रर्फी प्रदान गर्नु भयो ।
प्रतियोगितामा विजेता टिमले नगद ३० हजार र उपविजेता टिमले नगद २० हजार पाउने क्लबका उपाध्यक्ष कृष्ण तामाङले बताउनु भयो । १५ गतेबाट सुरु भएको प्रतियोगितामा ८ वटा टिमको सहभागिता रहेको थियो ।
