काठमाडौं। भोजपुरमा प्रहरी र विप्लव समूहबीच दोहोरो भीडन्त हुँदा दुई जनाको मृत्यु भएको छ। बुधबार विहान आठ बजे गस्तीमा रहेकाे प्रहरी र विप्लव समूहका कार्याकर्ताबीच भीडन्त हुँदा दुई जनाको मृत्यु भएको भोजपुरका प्रमुख जिल्ला अधिकारी नुरहरि खतिवडाले जानकारी दिए। प्रजिअ खतिवडाका अनुसार भीडन्तमा नेपाल प्रहरीका जवान सन्जिप राईको मृत्यु भएको छ।
यसैगरी विप्लव समूहतर्फ पनि एक जनाको मृत्यु भएको प्रजिअ खतिवडाले जनाए। ‘बुधबार विहान सवा आठ बजे भोजपुर सदरमुकाम नजिकै शनिवारे हटिया छेउमा प्रहरी र विप्लव समूहबीच गोली हाना हान हुँदा नेपाल प्रहरीका जवान सन्जिव राई र विप्लव समूहतर्फका निरकुमार राईको मृत्यु भएको छ,’ प्रजिअ खतिवडाले भने, ‘गस्तीमा रहेका प्रहरीलाई लक्षित गर्दै विप्लव समूहका कार्यकर्ताले गोली प्रहार गरेपछि दुवैपक्षबीच गोली हानाहान भएको हो।’
अहिले अवस्था नियन्त्रणमा आइसकेको उनले जनाए। सुरक्षाकर्मीले उक्त क्षेत्रलाई आफ्नो नियन्त्रणमा लिएको र अहिले नेपाल प्रहरी र शसस्त्र प्रहरीलाई परिचालन गरिएको छ। थप सुरक्षाकर्मी मगाउनुपर्ने अवस्था नरहेको प्रजिअ खतिवडाले जनाए। दुवै मृतकलाई जिल्ला अस्पतालमा राखिएको छ।
सरकारले गत फागुन २८ गते विप्लव समूहलाई प्रतिबन्ध लगाएपछि विप्लव समूह र सुरक्षाकर्मीबीच गोली हानाहानका घटना बढ्न थालेका छन्।
