काठमाडौं, २७ असार । मारवाडी समुदायको पकड रहेको सन्राईज बैंकका प्रमुख कार्यकारी अधिकृत निरज श्रेष्ठले बैंकमा हाजिर समेत गर्न नपाई राजीनामा गर्न बाध्य भएका छन् ।
गत जेठ पहिलो साता सन्राईज बैंकको सिईओमा नियुक्ति दिइएका श्रेष्ठले गत बुधबार राजीनामा पठाएका हुन् ।श्रेष्ठलाई नियुक्ति दिइएपछि सन्राईज बैंकको बोर्डमा भाँडभैलो मच्चिएको थियो ।
बैंकका अध्यक्ष मोतीलाल दुगडले श्रेष्ठलाई नियुक्ति दिलाएकोमा अन्य संचालकहरुले विरोध जनाएका थिए । खासगरी संचालक शैलेन्द्र गुरागाईले चर्को विरोध जनाएका थिए ।
गुरागाईले मोतीलाल दुगडका दाई मालचन्द दुगडलाई उचालेर निरज श्रेष्ठलाई बैंक छिर्नै नदिएको बैंक स्रोतले जनाएको छ । गुरागाईले श्रेष्ठलाई असक्षम बैंकर भन्दै कुनै हालतमा सीईओ बन्न नदिने अड्डी लिएका थिए ।
