काठमाडौं। एक वर्षदेखि जिम्मेवारीविहीन रहेका नेकपाका केन्द्रीय सदस्यहरुको कार्य विभाजन र विभाग गठनका विषयमा दुई अध्यक्षहरुबीच सहमति भएको छ ।
मंगलबार पार्टी अध्यक्ष तथा प्रधानमन्त्री केपी शर्मा ओली र अर्का अध्यक्ष पुष्पकमल दाहालबीच भएको छलफलमा सहमति जुटेको उच्च स्रोतले जानकारी दिएको छ ।
मंगलबार अपराह्न प्रधानमन्त्री निवास बालुवाटारमा भएको छलफलमा केन्द्रीय सदस्यहरुको कार्य विभाजन गर्ने र विभाग गठन गर्ने विषयमा सहमति जुटेको हो ।
सहमति जुटेसँगै नेकपाको एकता प्रक्रियाले पूर्णता पाउने भएको छ । दुई अध्यक्षबीच भएको सहमतिलाई अब पार्टी सचिवालयको बैठक बसेर निर्णय गर्ने तथा स्थायी कमिटिको बैठकले अनुमोदन गर्ने जनाइएको छ ।
तत्कालीन नेकपा एमाले र माओवादी केन्द्रबीच गत वर्ष जेठमा पार्टी एकीकरण भए पनि एकीकरण प्रक्रियाले पूर्णता पाएको छैन । करिब ५ सय सदस्यी नेकपाको केन्द्रीय कमिटिमा रहेका नेताहरुले जिम्मेवारी नपाउँदा उनीहरु भूमिकाबिहीन हुँदै आएका छन् ।
पार्टी एकीकरण प्रक्रियाले पूर्णता नपाउँदा सरकारको काममा समेत नकरात्मक प्रभाव परेको नेकपाकै नेताहरुले बताउने गरेका छन् ।
