काठमाडौं। सरकारले प्रतिबन्ध लगाएको नेत्रविक्रम चन्द विप्लव नेतृत्वको नेपाल कम्युनिष्ट पार्टी र सरकारी टोलीबीच अनौपचारिक ‘वार्ता’ सुरु भएको छ । उनीहरुबीच छलफल सुरु भएकोले यसले छिट्टै औपचारिकता पाउने विश्वास गरिएको छ । सरकारले गठन गरेको वार्ता टोलीका संयोजक सोमप्रसाद पाण्डेले हिजो विप्लवका नेताहरुसँग अनौपचारिक छलफल भएको स्वीकारे ।
‘मिडियामा आएजस्तो औपचारिक वार्ता नै सुरु भएको भने होइन’ पाण्डेले डिसीनेपालसँग भने ‘तर हामीले वार्ताका लागि विश्वासको वातावरण बनाइरहेका छौं । पाण्डेले अहिले पनि आफू विप्लवका नेताहरुसँग निरन्तर सम्पर्कमा रहेको बताए । सहमति नै गर्नेगरी वार्ता सुरु नभए पनि छलफल सुरु भएकोले उनले यसले सकारात्मक सन्देश दिने विश्वस व्यक्त गरे ।
केही मिडियामा सहमति नै हुने गरी वार्ता सुरु भएको समाचार आएकोले यसले समस्या पारेको उनको भनाइ थियो । ‘केही समाचारका कारण वार्ता नै भाँडिएलाजस्तो स्थिति समेत आयो’ उनले भने । पाण्डेले आफूले पुनः छलफल अगाडि बढाउन प्रयास गरिरहेको समेत जानकारी दिए ।
सरकारी टोलीसँग विप्लवका नेताहरुको हिजो एकपटक छलफल भएको थियो । त्यसपछि आज गृहजिल्ला पाल्पामा तिनाउमा बनेको पुल उद्घाटन कार्यक्रममा पुगेका पाण्डे अहिले बुटवलमा छन् । उनले विप्लवका नेताहरुसँग छलफल गर्ने प्रयास गरिरहेको र उताबाट सकारात्मक सन्देश आएका छलफल अगाडि बढाइने जानकारी दिए ।
