काठमाडौं ।संघीय मामिला तथा सामान्य प्रशासन मन्त्री लालबाबु पण्डित र उर्लावारी नगरपालिकाका मेयर खड्ग फागोबीच भेटवार्ता भएको छ ।
बिहान मन्त्रालयमा भएको उक्त भेटवार्तामा मन्त्री पण्डितले उर्लावारीलाई दमकल सहयोग गर्ने प्रतिबद्धता जनाएका छन् ।
मेयर खड्ग फागोले अगालगीका कारण उर्लावारीमा वर्षेनी धेरै क्षति हुने गरेको र दमकल आवश्यक रहेको बताएपछि मन्त्री पण्डितले उक्त प्रतिबद्धता जनाएका हुन् । मन्त्री पण्डितले दातृ निकायसँग दमकल सहयोगका लागि माग गरिसकेको र आउने बित्तिकै उर्लावारीलाई प्राथमिकता राख्ने जनाएका हुन् ।
करिब एक घन्टा लामो भएको उक्त भेटवार्तामा मन्त्री पण्डितले उर्लावारीको पछिल्लो घटनाक्रमबारे चासो देखाएका थिए । उनले जनप्रतिनिधिलाई काम गर्दा मुद्दा लाग्ने र यस्ता विषयमा कतै विचलित नभई जनताको काममा सधैँ खटिरहन मेयर फागोलाई सुझाव दिए ।
भेटमा मेयर खड्ग फागोले उर्लावारीमा विकास बजेट तथा अन्य राष्ट्रियस्तरीय योजनाहरू उर्लावारीलाई दिन समेत आग्रह गरेका थिए । मन्त्री पण्डितले आफ्नो गृह जिल्लाको नगरपालिका पनि भएकाले उर्लावारीलाई सधैँ प्राथमिकतामा राख्ने र बजेट तथा योजनाहरू बढाईदिने प्रतिबद्धता जनाए ।
यस्तै उनीहरूबीच करिब आधा घन्टा गोप्य भेटवार्ता पनि भएको छ । उक्त भेटवार्तामा उर्लावारीको समसामयिक विषयवस्तु र घटनाबारे मन्त्री पण्डितलाई जानकारी गराएको मेयर फागोले जानकारी दिए ।
यस्तै मेयर फागोले उर्लावारीको दीर्घकालीन विकास तथा विकास गतिविधिहरूबारे पनि मन्त्री पण्डितलाई जानकारी गराउदै संघीय सरकारको तर्फबाट हुनसक्ने सहयोगको अपेक्षा गरेका थिए । उनीहरूबीच उर्लावारीको विकासमा संघीय सरकारको तर्फबाट हुन सक्ने सहयोगको विषउमा छलफल भएको थियो ।
मन्त्री पण्डितले मेयर फागोलाई कहिल्यै पनि विचलित नहुन सुझाव दिए । उनले काम गर्दा मुद्दा लाग्ने,खुट्टा तान्ने प्रवृत्ति नेपालमा रहेको बताउदै सत्यको सधैँ जित हुने भन्दै मेयर फागोलाई बताए । मन्त्री पण्डितले उर्लावारीलाई सहयोग गर्न आफु जुनसुकै बेला सधैँ तयार रहेको बताए ।
