काठमाडौं, ७ भदौ । नेपाली कांग्रेस नेतृ डा. डिला संग्रौलाले शालीकराम पुडासैनीको आत्महत्या प्रकरणमा अनुसन्धानका लागि जेलमा रहेका रवि लामिछानेसँग भेट गरेकी छन् । सांसदसमेत रहेकी डा. संग्रौलाले शनिबार बिहान चितवनको जेलमा रहेका लामिछानेसँग भेट गरेकी हुन् ।
भेटका क्रममा रविले सांसद संग्रौलासँग अदालतबाट न्याय पाउने आशामा रहेको बताएका थिए । उनले सबै जनाको साथ सहयोग चाहेको बताए । साथै उनले अनुसन्धान प्रक्रिया चाँडै टुंगियोस भन्ने कामना गरेको बताएका छन् ।
‘प्रहरीले चाँडै अनुसन्धान सकोस् । मैले न्याय पाउनेमा विश्वस्त छु’, लामिछानेको भनाई उदृत गर्दै सांसद संग्रौलाले हटलाइनखबरसँग भनिन्, ‘शालिकरामका हत्यारा चाँडै पत्ता लागोस् । म जेलबाट निस्किनेबित्तिकै अपराधी पत्ता लगाइदिन्छु भन्नु भएको छ ।’
भेटका क्रममा सांसद संग्रौलाले निर्दोषलाई दोषी बनाउने र अपराधि उम्किन नहुने बताएकी थिइन् । उनले अनुसन्धानका नाममा म्याद थप्ने काम मात्र भएको भन्दै छिट्टो अनुसन्धान प्रक्रिया टुंगोमा पुर्याउन माग गरेकी छिन् ।
आन्दोलनका क्रममा महिलामाथि हातपात भएको भन्दै सांस संग्रौलाले आपत्ति जनाएकी छन् । उनले शान्तिपूर्ण आन्दोलनमा हस्तक्षेप भएको बताइन् ।
रविलाई भेट्न सांसद संग्रौलासहित प्रदेश सांसद मिलनबाबु श्रेष्ठ र नेपाली कांग्रेस चितवनका नेताहरु गएका थिए ।
चितवनको एक होटलमा माउण्टेन टेलिभिजनमा कार्यरत पत्रकार पुडासैनीको चितवनको एक होलामा झुण्डिएको अवस्थामा शव भेटिएको थियो । आत्महत्या गर्नुअघि पुडासैनीले रवि लामिछानेसहित तीन जनाको नाम एक भिडियोमा लिएका थिए ।
त्यही भिडियोकाआधारमा र परिवारका सदस्यले किटानी जाहेरी दिएपछि रविलाई पक्राउ गरिएको थियो । रविलाई आत्महत्या गर्न प्रोत्साहन गरेको अभियोगमा हिरासतमा लिइएको छ ।
