काठमाडौं । कांग्रेसमा पहिलो चरणमा गठन हुने १६५ प्रतिनिधिसभा र ३३० प्रदेशस्तरीय समितिका लागि निर्वाचन समितिले सम्बन्धित जिल्लाबाटै प्रतिनिधि खटाउने तयारी गरेको छ । पहिलो चरणमा २० भदौसम्म समिति समायोजन गर्न केन्द्रबाट नभई सम्बन्धित जिल्लाबाटै प्रतिनिधि खटाउने तयारी भएको निर्वाचन समितिका संयोजक राधेश्याम अधिकारीले जानकारी दिए ।
‘निर्वाचन नहुने भएकाले पहिलो चरणमा हुने संरचना गठनका लागि निर्देशिकाले धेरै विषय प्रष्ट पारिसकेको छ,’ अधिकारीले भने, ‘यस्तो हुँदा केन्द्रका प्रतिनिधि भएर काम गर्न जिल्लाकै साथीहरू अबको तीन दिनभित्रमा तोक्छौँ । यसअघि केन्द्रबाटै ७७ वटै जिल्लामा प्रतिनिधि खटाउने तयारी निर्वाचन समितिको थियो । तर, निर्वाचन नहुने गरी निर्देशिकाले संरचना गठनको बाटो खुलाएपछि सहज अवस्थामा जिल्लाबाटै प्रतिनिधि खटाएर संरचना गठन गर्ने तयारी समितिको छ ।
प्रतिनिधि खटाउँदा कांग्रेस निकटका कानुन व्यवसायी, प्राध्यापक, शिक्षक संघसहितका संस्थाबाट खटाउने तयारी छ । अधिकारीले २० भदौभित्र प्रतिनिधिसभा र प्रदेशसभाका संरचना गठन हुने दाबी गरे । त्यसपछि कात्तिक मसान्तसम्म स्थानीय तहमुनिका संरचना गठनको तयारीमा लाग्ने जानकारी उनले दिए ।
