काठमाडौं । फिफा विश्वकप छनौटको दोस्रो चरणको एसियाली छनौटतर्फ आज आफ्नो पहिलो अवे खेलमा नेपालले कुवेतको सामना गर्दैछ । यस बर्ष कुवेत र नेपालबीच यो तेस्रो भेट समेत हो ।
यसअघि मार्च मै कुवेतमा भएको दुई मैत्रीपूर्ण फुटबल म्याचतर्फ पहिलो खेल बराबरीमा सकिएको थियो भने दोस्रो खेलमा नेपालले १–० को हार बेहोरेको थियो ।
खेलको पूर्व सन्ध्यामा आयोजित पत्रकार सम्मेलनमा दुवै टोलीले तयारी राम्रो गरेको र एक आपसमा भिड्न तयार रहेको बताईसकेका छन् । कुवेत र नेपालबीचको पछिल्ला तथ्यांकलाई हेर्दा यी दुई टोली कुल पाँचपटक भिडेका छन् ।
जसमा चार खेल कुवेतले जितेको छ भने एक खेल बराबरीमा सकिएको छ । आज कुवेत स्पोर्टस क्लबमा नेपाली समयअनुसार राती ११ बजे हुने खेलमा कुवेतलाई नै बलियो प्रत्याशी मानिएको छ । यद्यपि नेपालले कुवेतको डटेर सामना गर्ने पनि स्पष्ट पारेको छ ।
यदि नेपालले आज कुवेतलाई हराए, त्यो नेपालका लागि ऐतिहासिक जित पनि हुनेछ । तर त्यो त्यति सजिलो भने हुने छैन । यद्यपि आजको खेल दुवै टोली टोलीका लागि निकै महत्वपूर्ण पनि छ ।
विश्वकप छनौटतर्फ समूह बी मा परेको नेपाल र कुवेतसँगै पावरहाउस अष्ट्रेलिया, जोर्डन र चाइनिज ताइपेई रहेका छन् ।
