दीपक बास्तोला
उर्लाबारी । सामुदायिक विकास मञ्च उर्लाबारीले उर्लाबारी रन २०७६ प्रतियोगिताको आयोजना गर्ने भएको छ । शुक्रबार पत्रकार सम्मेलन गरी असोज ४ गते सो प्रतियोगिता गरिने भएको आयोजकले पत्रकार सम्मेलन मार्फत जानकारी गराएको छ । ‘स्वास्थ्यका लागि दौड’ भन्ने मुख्य नाराका साथ आयोजना गरिने सो प्रतियोगितामा ७ सय भन्दा बढीको सहभागिता रहने आयोजक समितिका संयोजक प्रभू राईले बताए । बालकालिका, महिला, पुरुष र भेट्रान गरी दौड प्रतियोगिता सञ्चालन गरिने उनले जानकारी दिए । राष्ट्रियस्तरमा उर्लाबारीको पहिचान गराउने उद्देश्यले सो प्रतियोगिता आयोजना गर्दै आएको सामुदायिक विकास मञ्चका अध्यक्ष ढुण्डुराज भट्टराईले बताए ।
बालक बालिकातर्फ प्रथम हुनेलाई ३ हजार, दोस्रो हुनेलाई २ हजार, तेस्रो हुनेलाई १ हजार र चौँथो हुनेलाई ५ सय रुपैयाँ प्रदान गरिने छ । खुल्ला पुरुषतर्फ प्रथम हुनेलाई नगद ११ हजार, दोस्रो हुनेलाई ९ हजार, तेस्रो हुनेलाई ७ हजार र चौँथो हुनेलाई १ हजार रुपैयाँ पुरस्कार प्रदान गरिने संयोजक राईले जानकारी दिए । महिलातर्फ प्रथम हुनेलाई नगद १० हजार, दोस्रो हुनेलाई ७ हजार, तेस्रो हुनेलाई ५ हजार र चौँथो हुनेलाई १ हजार रुपैयाँ पुरस्कार प्रदान गरिने उनले बताए । त्यसैगरी भेट्रानतर्फ प्रथम हुनेलाई ५ हजार, दोस्रो हुनेलाई ३ हजार, तेस्रो हुनेलाई २ हजार र चौथो हुनेलाई १ हजार रुपैयाँ पुरस्कार प्रदान गरिने उनले बताए ।
त्यस्तै, उर्लाबारी नगर स्तरीय खुल्ला दौड पुरुषतर्फ पुरुष प्रथम हुनेलाई ४ हजार, दोस्रो हुनेलाई ३ हजार, तेस्रो हुनेलाई २ हजार र चौँथो हुनेलाई ५ सय रुपैयाँ पुरस्कार प्रदान गरिने उनको भनाई छ । त्यस्तै, नगर स्तरीय महिलातर्फ प्रथम हुनेलाई नगद ३ हजार, दोस्रो हुनेलाई २ हजार, तेस्रो हुनेलाई १ हजार र चौँथो हुनेलाई ५ सय रुपैयाँ पुरस्कार प्रदान गरिने सचिब प्रेम बोहोराले जानकारी दिए । पुरकस्कृत सबैलाई ५ लाख बराबरको निशुल्क जिवन बिमा समेत गराईने भएको छ । प्रतियोगितामा करिब ५ लाख २४ हजार ५ सय रुपैयाँ खर्च हुने अनुमान गरिएको छ ।
