नेकपा निकट कुमार पन्तको पल्ला भारी,आयो बधाइको ओइरो
काठमाडौंमा जारी गैरआवासीय नेपाली संघ (एनआरएनए)को नवौं महाधिवेशनको चुनावी कार्यक्रम सकिएको छ । बुधबार हुने भनिएको चुनावी कार्यक्रम बिहीबार बिहान १० बजेबाट सुरु भएको थियो । बिहीबार साँझ सम्पन्न मतदानमा २३४४ मत खसेको छ । अब मतगणनाको तयारी हुँदैछ । अध्यक्षमा कुमार पन्त र कुल आचार्यबीच प्रतिस्पर्धा भएको छ ।
मत खसेको आधारमा कुमार पन्तले अग्रता लिएका छन् । उनले करिब ५ सय मतले कुल आचार्यलाई पछि पारेको अनुमान गरिएको छ । मतदान अघिसम्म हो–हल्ला भए पनि मतदान सुरु भएसँगै एनआरएनहरु शान्त वातावरणमा चुनावी कार्यक्रममा सहभागी भए । निकै रस्साकसीकाबीच भएको मतदान प्रक्रियामा सदस्यहरुको उत्साहजनक सहभागिता देखिएको छ । कुल आचार्यले जित्ने र कुमार पन्त हार्ने हल्लालाई एनआरएनहरुले ‘हल्ला जत्ति भए पनि परिणाम उही, कुमार पन्तको पल्ला भारी’ भन्न थालेका छन् । मत खसेसँगै कुमार पन्त पक्ष उत्साहित भएका छन्, एक अर्कालाई बधाई तथा शुभकामना दिन थालेका छन् ।
आगामी दुई वर्षे कार्यकालका लागि नयाँ नेतृत्व चयन गर्न लागेको एनआरएनएको नवौ महाधिवेशनका लागि करिब २५ सय एनआरएनहरु काठमाडौंमा आएका छन् । हाल भवन भट्ट अध्यक्ष छन् ।
