काठमाडौं । सत्तारुढ नेपाल कम्युनिस्ट पार्टी ९नेकपा०का निलम्बित सांसद कृष्णबहादुर महराले बयान दिन अटेर गरेका छन् ।
स्वास्थ्य सामान्य हुँदा पनि क्याविनमा बसेर बयान रोक्न मिल्छ महरा जी ? आम नागरिक प्रश्न गरिरहेका छन् ।
महराले प्रहरीलाई पत्र पठाएर स्वास्थ्यको कारण देखाउँदै बयान दिन अस्वीकार गरेका छन् । जिल्ला प्रहरी कार्यालय काठमाडौंका प्रमुख उत्तम सुवेदीले महराको स्वास्थ्यका कारण बयानमा केही ढिलाइ भएको बताए ।
संसद सचिवालयकी कर्मचारीलाई जबरजस्ती करणी गरेको अभियोगमा पक्राउ परेका महरा काठमाडौंको थापाथलीस्थित महँगो निजी अस्पताल नर्भिकको क्याबिनमा बसेर उपचार गराउँदै आएका छन् ।
प्रहरीले महरासँग प्रारम्भीक सोधपुछ गरेपनि सरकारी वकिलको उपस्थितिमा थप बयान दिन भने मानेका छैनन् । बरू स्वास्थ्यका कारण अहिले बयान दिन नसक्ने चिठी अस्पतालबाट प्रहरीलाई दिन लगाएका हुन् ।
महराको शरीरमा सुगरको मात्रा, अनिद्रा र तनाव बढेको नर्भिक अस्पतालले जनाएको थियो । असोज १९ गते पक्राउ परेका महरा २३ गतेदेखि नर्भिक अस्पतालको क्याविनमा बसिरहेका छन् ।
महरालाई हिरासतमा राखेर अनुसन्धान गर्ने म्याद शुक्रबारसम्ममात्र अदालतले दिएको छ । शुक्रबारसम्म पनि उनको बयान लगायतका अन्य अनुसन्धान नसकिए आइतबारफेरि म्याद थप्न भने सकिन्छ ।
महरा पक्राउ परेको १२ दिन पुगिसकेको छ । अझै १३ दिनसम्म उनीमाथि मुद्दा चलाउने वा नचलाउने निर्णय गरिसक्नुपर्नेछ ।
महराले बयान दिन नमाने पनि प्रहरीले अन्य प्रमाणहरू संकलन गरेर २५ दिनभित्र सरकारी वकिल कार्यालयमा प्रतिवेदन पेश गर्नुपर्नेछ ।
संसद सचिवालयकी कर्मचारी रोशनी शाहीले आफूले इन्कार गर्दा गर्दै महरा असोज १२ गते आफ्नै घर आएर जबरजस्ती करण गर्न खोज्दा कुटपिट गरेको जनाएकी थिइन् ।
महरालाई प्रहरीले असोज १९ गते सभामुख निवास बालुवाटारबाटै पक्राउ गरेको थियो । दशैँका बेला खसी काटेर खाने तयारी गरिरहेका बेला प्रहरीले महरालाई गिरफ्तार गरेको थियो ।
