विराटनगर / भारतीय नक्साबाट नेपाली भूमि हटाउन माग गर्दै विराटनगरमा भारतविरुद्ध प्रदर्शन भएको छ ।
अनेरास्ववियू मोरङ जिल्ला कमिटिको आयोजनामा आज भएको प्रदर्शनमा सहभागीहरुले भारतले दादागिरी देखाउँदै नेपालको लिपुलेक, कालापानी र लिम्पीयाधुरालाई आफ्नो नक्सामा राखेको भन्दै आक्रोश व्यक्त गरेका थिए ।
जनआन्दोलन चोकबाट सुरु भएको प्रदर्शन हनुमान मन्दिर अगाडी पुगेर कोणसभामा परिणत भएको थियो । प्रदर्शनमा सहभागीहरुले ‘गो व्याक इन्डिया’, ‘लिपुलेक, कालापानी र लिम्पियाधुरा हाम्रो हो’, ‘अतिक्रमण गरिएका नेपाली भूमि फिर्ता गर’ भन्दै प्लेकार्डसहित भारतविरुद्ध चर्का नाराबाजी गरेका थिए । भारतविरुद्ध प्रदर्शन गरेका युवाहरूले सीमा मिचिँदा गोर्खालीहरू चुप लागेर नबस्ने चेतावनी दिएका छन् ।
भारतले नेपालको भू–भाग आफ्नो भएको दाबीसहित नयाँ नक्सा निकालेपछि सरकारले भारतको नयाँ नक्सालाई स्वीकार नगर्ने जनाएको छ । पश्चिम नेपालको लिपुलेक, कालापानी, लिम्प्याधुरालगायतको क्षेत्र भारतले आफ्नो नक्सामा समेटेपछि त्यसको चौतर्फी विरोध भइरहेको छ ।
