प्रख्यात एवम् सम्मानित पार्श्व गायिका लता मंगेशकर गम्भीर बिरामी परेकी छन् । सर्वश्रेष्ठ गायिकाको सम्मान पाएकी मंगेशकरको मुम्बईको ब्रीच केन्डी अस्पतालको आईसीयूमा उपचार भइरहेको छ ।
छातिमा भाइरल इन्फेक्सनको समस्या देखिएपछि सोमबार दिउँसो उनलाई अस्पताल लगिएको थियो । लता मंगेशकरको तर्फबाट अनुशा श्रीनिवासनले जारी गरेको विज्ञप्तिमा लेखिएको छ– “लता मंगेशकरको उमेरको ख्याल राख्दै अस्पतालमा भर्ना गरिएको छ र स्वास्थ्य स्थिर छ ।”
स्वास फेर्न समस्या भएपछि ९० वर्षीया लतालाई मुम्बइको ब्रिज क्यान्डी अस्पताल पुर्याइएको पारिवारिक स्रोतले पनि पुष्टि गरेको खबर भारतीय सञ्चार माध्यमले लेखेका छन् ।
सन् १९४२मा गाउन शुरु गरेकि उनले एक हजार भन्दा बढी बलिवुडका चलचित्रहरूमा ३६ भाषाहरूमा स्वर दिएकी छिन। उनी आशा भोसले, ह्रिदयनाथ मंगेशकर, उशा मंगेशकर र मीना मंगेशकरको दिदी हुन।
भारत रत्न, दादा साहब फाल्केजस्ता सम्मानबाट सम्मानित लता मंगेशकर भारतीय सिनेमा जगतको सर्वश्रेष्ठ गायिका मानिन्छिन् । उनले कैयौं नेपाली गीत पनि गाएकी छन् । मंगेशकर गिनिज बुकमा सन् १९७४ देखि १९९१ सम्म सबैभन्दा बढी गितहरू रेकर्ड गराउने गायिकाको रूपमा दाखिल थिईन।
