काठमाडौं । नेपाल टेलिकमले ब्लक एसएमएस सेवा ल्याएको छ । यसबाट एकै पटकमा धेरै जनालाई एकै प्रकारको सन्देश पठाउन सहज हुन्छ ।
नेपाल टेलिकमले ल्याएको यो सेवा विशेषबाट विशेष गरी धेरै सदस्य वा ग्राहकसँग नियमित सम्पर्क गर्नुपर्ने व्यापारिक प्रतिष्ठान, शैक्षिक संस्था, वित्तीय संस्था, पर्यटन व्यवसायी, सरकारी, अर्धसरकारी र गैरसरकारी निकायलगायत संघसंस्थाका लागि उपयोगी हुने जनाएको छ ।
यसका साथै यसबाट व्यक्तिगत प्रयोजनका रुपमा एकैपटक धेरै व्यक्तिलाई एसएमएस (छोटो सन्देश) पठाउन सक्नेछन् ।
यो सुविधासंघ संस्थाले नेपाल टेलिकमको केन्द्रीय कार्यालयस्थित प्रमुख व्यावसायिक अधिकृतको कार्यालय, विभिन्न ठाउँमा रहेका निर्देशनालयमार्फत र व्यक्तिगत उपभोक्ताले कम्पनीको अनुमति प्राप्त भ्यालु एडेड सर्भिस सेवाप्रदायक संस्थासँग सम्पर्क गरी सेवा प्राप्त गर्न सकिने टेलिकमले जनाएको छ ।
सेवा लिन सेवाप्रदायकले आफ्नो प्रस्ताव र अन्य कागजातका साथ प्रमुख व्यावसायिक अधिकृतको कार्यालयमा सम्पर्क राख्नु पर्नेछ ।
यो सेवा प्रिपेड प्रकृतिको भएको हुनाले एसएमएस संख्याका आधारमा लाग्ने शुल्क भुक्तानी गरिसकेपछि युजर नेम र पासवर्ड उपलब्ध हुनेछ ।
युजर नेम तथा पासवर्ड प्राप्त गरेपश्चात मात्रै टेलिकमको वेबसाइट प्रयोग गरी यो सेवा उपभोग गर्न सकिने टेलिकमले जनाएको छ ।
नेपाल टेलिकमले सेवा लिन चाहने संघ–संस्थाले मासिक न्यूनतम १ हजार ५ सय एसएमएस पठाउनुपर्ने जनाएको छ ।
सोभन्दा कम एसएमएस पठाउन चाहने संघ संस्थाले कम्पनीबाट अनुमति प्राप्त सेवा प्रदायकसँग सम्पर्क गरी लाभ लिन सकिनेछ । टेलिकमले एसएमएस संख्याको आधारमा शुल्क निर्धारण गरिएको छ ।
