सुन्दरहरैंचा । मोरङको सुन्दरहरैंचामा सम्पन्न बरमनिया÷घेराबनी खुला नकआउट फुटबल प्रतियोगिताको उपाधि सुन्दरहरैंचा–४ ले जितेको छ । सुन्दरहरैंचा–३ स्थित आदर्श युवा क्लवको आयोजना तथा सिर्जनशील क्लवको सहआयोजनामा भएको फुटबल प्रतियोगिताको उपाधि भिडन्तमा आयोजक आदर्श युवा क्लवलाई ० का विरुद्ध २ गोलले पराजित गर्दै सुन्दरहरैंचा वडा नम्बर ४ ले उपाधि जितेको हो ।
उपाधि विजेता वडा नम्बर ४ ले ट्रफिसहित नगद २५ हजार हात पारेको छ भने उपविजेता आयोजक आदर्श युवा क्लवले ट्रफिसहित नगद १५ हजार पाएको छ । विजेता वडा नम्बर ४ का लागि दोश्रो हाफमा अनिश चौधरी र सागर थापाले गोल गर्दै आफ्नो टिमको जित सुनिश्चित गरे । पहिलो हाफ निकै प्रतिस्पर्धात्मक रहेको खेलको दोश्रो हाफमा वडा ४ ले अयोजकमाथि निकै दवाव राखेको थियो । विजयी खेलाडीहरुलाई प्रमुख अथिति सुन्दरहरैंचा वडा नम्बर ३ का वडाध्यक्ष जीवनप्रसाद ढुंगाना, उद्योग वाणिज्य संघ सुन्दरहरैंचाका अध्यक्ष नवराज चापागाईं लगायतले ट्रफि तथा पुरस्कार प्रदान गरेका थिए । प्रतियोगितामा सुन्दरहरैंचा नगरपालिका र बूढीगंगा गाउँपालिकाका गरि १२ वटा टिमको सहभागीता रहेको थियो ।
