काठमाडौं । प्रधानमन्त्री केपी शर्मा ओलीले बालुवाटार सर्न हतार गरेपनि चिकित्सकले अनुमति नदिएपछि केही दिन अस्पतालमै बस्नुपर्ने भएको छ । ओलीले बुधबार नै अस्पतालबाट डिस्चार्ज हुन चाहेका थिए । तर स्वास्थ्य अवस्था सन्तोषजनक रुपमा सुधार भैनसकेकाले केही दिन चिकित्सकको निगरानीमा अस्पतालमै बसेर उपचारलाई निरन्तरता दिनुपर्ने सुझाव पाएपछि प्रधानमन्त्री ओलीले केही दिन डिस्चार्ज लिन अनुमति नपाएको थाहा भएको छ ।
महाराजगञ्जस्थित मनमोहन कार्डियोथोरासिक भास्कुलर एण्ड ट्रान्सप्लान्ट सेन्टरमा उपचारत प्रधानमन्त्री केही दिन अस्पतालमै रहेर स्वास्थ्यलाभ गर्नुहुने उनका प्रेस सल्लाहकार सूर्य थापाले बताएका छन् ।
प्रधानमन्त्रीको स्वास्थ्यमा उल्लेखनीय सुधार भएको र हाल चिकित्सकीय अवलोकनमा राखिएको अस्पतालले जनाएको छ । यही मङ्सिर १० गते प्रधानमन्त्री ओलीको एपेन्डिसाइटिसको शल्यक्रिया गरिएको थियो ।
