उर्लाबारी , १२ पुस ।
नेपाली कांग्रेस उर्लाबारीका पूराना नेता जनक खड्काले पार्टी परी त्याग गरी राप्रपामा प्रवेश गर्नुभएको छ ।
आज उर्लाबारी–७ मा राप्रपाले आयोजना गरेको जागरण अभियान कार्यक्रममा नेपाली कांग्रेस उर्लाबारी वडा नं. ६ का सभापतिसमेत रहनुभएका खड्काले पार्टी परित्याग गर्दै राप्रपामा प्रवेश गर्नुभएको हो । कांग्रेस पार्टीमा विकृति मौलाउँदै गएकाले पार्टी परित्याग गरी राप्रपा रोजेको उहाँको भनाई छ । उहाँले कांग्रेसबाट परिवर्तनको सम्भव नरहेको समेत उल्लेख गर्नुभयो ।
लामो समय कांग्रेसका विताएका खड्काले पार्टी परित्याग गर्नुलाई अर्थपूर्ण रुपमा हेरिएको छ । त्यस्तै, नेकपाका टेकबहादुर मगर, ३३ दलीय मोर्चाका रामप्रसाद सुवेदी, सूर्यप्रसाद न्यौपाने, हर्क दर्जी, सन्तोष साह, दिपक साह, रोशन साह, टेकनाथ नेपाल, होमनाथ हमाललगायत पनि पराप्रपामा प्रवेश गर्नुभएको छ । कार्यक्रमका प्रमुख अतिथि झापा क्षेत्र नं. ३ का प्रतिनिधि सभाका सांसद एबं राप्रपाका महामन्त्री राजेन्द्र लिङ्देनले नवप्रवेशीहरुलाई अबिर र खदा लगाएर स्वागत गर्नुभएको थियो ।
