काठमाडौं । सत्तारूढ नेपाल कम्युनिस्ट पार्टी (नेकपा) अध्यक्षद्वय केपी शर्मा ओली र पुष्पकमल दाहालसमक्ष उपसभामुख डा. शिवमाया तुम्बाहाङ्फेले आफूलाई सभामुख बनाउन प्रस्ताव गरेकी छन् । प्रधानमन्त्री निवास बालुवाटारमा शुक्रबार भएको छलफलमा उपसभामुख तुम्बाहाङफेले यस्तो प्रस्ताव गरेकी हुन् । प्रधानमन्त्री समेत रहेका नेकपा अध्यक्ष ओली र अर्का अध्यक्ष दाहालले तुम्बाहाङफेलाई उपसभामुख पदबाट राजीनामा गर्न छलफलमा बोलाएका थिए ।
ओली, दाहाल र तुम्बाहाङफेको त्रिपक्षीय छलफलमा सभामुखको उम्मेदवार टुंगो लगाउने विषयमा छलफल भएको बालुवाटार स्रोतले जनाएको छ । उपसभामुख तुम्बाहाङफेले सभामुखको टुंगो नलागेसम्म आफूले राजीनामा गर्न नसकिने बताएकी छन् ।
छलफलमा तुम्बाहाङफेले अध्यक्षद्वय ओली र दाहाललाई निकास दिन आग्रह गरेकी छन् । अब संसद्लाई अनिर्णयको बन्दी बनाउन नसकिने भन्दै छिटो निकास दिन आग्रह गरेकी उनले सभामुख पदमा आफ्नो पनि दावी रहेको बताइन् ।
अध्यक्षद्वय ओली र दाहालबीच सभामुख उम्मेदवार टुंगो लगाउन पटकपटक छलफल भए पनि निकास निस्कन सकेको छैन । ओलीले नेकपा संसदीय दलका उपनेता तथा पूर्वसभामुख सुवासचन्द्र नेम्वाङ र दाहालले स्थायी कमिटी सदस्य अग्नि सापकोटालाई सभामुख बनाउन खोजेका छन् । उता राष्ट्रपति विद्यादेवी भण्डारीले उपसभामुख तुम्बाहाङफेलाई नै सभामुख बनाउन खोजेकी छन् ।
बलात्कार प्रयास आरोपमा कृष्णबहादुर महराले सभामुख पदबाट राजीनामा दिएपछि नेकपाले नयाँ सभामुखको खोजी गरेको हो । महरा तत्कालीन माओवादी केन्द्रको कोटाबाट सभामुख भएकाले सो पदमा माओवादी केन्द्रकै नेता हुनुपर्ने अडानमा दाहाल रहेका छन् ।
तर, प्रधानमन्त्री ओलीले महराकै कारण अमेरिकाको मिलिनियम च्यालेन्ज कर्पोरेसन (एमसीसी) सम्झौता संसद्बाट पारित नभएकाले नेम्वाङलाई सभामुख बनाउनुपर्ने अडानमा रहेका छन् ।
उपसभामुख तुम्बाहाङफेले २७ गते बस्ने प्रतिनिधिसभाको बैठक सार्न नसकिने जानकारी अध्यक्षद्वय ओली र दाहाललाई गराएकी छन् । त्यस दिन बैठक सञ्चालन हुने आवश्यक वातावरण मिलाउन पनि अध्यक्षद्वयसँग उनले आग्रह गरेकी छन् ।
गत ४ पुसमा सुरु भएको प्रतिनिधिसभाको हिउँदे बैठक त्यसयता बस्न सकिरहेको छैन । गत ११ पुसमा बस्ने भनिएको बैठक बस्नुपूर्व सूचना टाँस गरेर १६ पुसका लागि बोलाइएको थियो । १६ पुसको बैठक पनि बस्दै नबसी सूचना टाँस गरेर आगामी २७ गतेका लागि तोकिएको छ ।
नेकपाले सभामुख उम्मेदवारको टुंगो लगाउन नसक्दा संसद् अनिर्णयको बन्दी भएको भन्दै प्रतिपक्षी दलले आलोचना गरिरहेका छन् । नेकपाभित्र सभामुख उम्मेदवारका साथै एमसीसी सम्झौता पेचिलो बन्दै गएको छ । यी दुई विषयमा पार्टीले कुनै निर्णय गर्न नसक्दा समस्या बढेको नेकपा नेता बताउँछन् ।
