काठमाडौं । राष्ट्रिय प्रजातन्त्र पार्टी नेपालका अध्यक्ष कमल थापाले सरकारले राष्ट्रिय एकता दिवस मनाउँन कन्जुस्याइँ गरेको आरोप लगाएका छन् । एकता दिवस तथा पृथ्वीनारायण शाहको जन्म जयन्तीको अवसरमा काठमाडौंमा आयोजित चियापान कार्यक्रममा बोल्दै उनले उक्त कुरा बताएका हुन् ।
'सरकारले पृथ्यीजयन्तीका दिन सार्वजनिक बिदा कटौती गरेर ठूलो भूल गरेको छ', उनले भने । ‘राष्ट्रय एकता दिवस मनाउँनको लागि सरकारी तवरबाट विभिन्न कार्यक्रम भएका छन् । तर, सरकारले सार्वजनिक बिदा कटौती गर्यो,’ उनले भने, ‘त्यसैले नेपाल कम्युनिष्ट पार्टीको बहुमतको सरकार र विशेषत प्रधानमन्त्री केपी शर्मा ओलीले त्यस विषयमा ध्यान दिन आवश्यक छ ।’
राष्ट्रिय एकीकरण एउटा राजनीतिक दल र व्यवस्थासँग मात्रै सम्बन्धित नभएको उनको भनाई थियो । 'राष्ट्र निर्माताको योगदानबारे विगतमा केही भ्रम थिए । केही नकारात्मक सोच थिए । अहिले प्रायः सबै राजनीतिक दल र नेताहरूले पृथ्वीनारायण शाहको योगदानलाई सकारात्मकरूपमा लिनु भएको छ', उनले भने ।
सरकारले पनि राष्ट्रिय एकता दिवासलाई राष्ट्रिय दिवसका रूपमा मनाउन र पृथ्वीनारायणको तस्बिरलाई नोटमा अंकित गर्नुपर्ने धारणा व्यक्त गरे । सरकारी स्तरबाट राष्ट्रिय पर्वकारूपमा नमनाइए पनि जनस्तरमा भव्यरूपमा मनाइँदै आएको उनको बताए ।
