काठमाडौं : भ्रष्टाचार निवारण सम्बन्धी सूचकांकमा नेपालको स्थान अझै सन्तोषजनक देखिएको छैन ।
यद्यपि अघिल्लो वर्ष भन्दा अंक बढाएको छ । अघिल्लो वर्ष १ सय २४औं स्थानमा रहेको नेपाल यस पटक १ सय १३औं स्थानमा उक्लिएको छ । ‘ट्रान्सपरेन्सी इन्टरनेश्नल’ले जम्मा १ सय ८० देशको रिपोर्ट बिहीबार सार्वजनिक गरेको हो ।
जसमध्ये सबैभन्दा कम भ्रष्टाचार हुने मुलुक डेनमार्क देखिएको छ । एक सय पूर्णाकका आधार मानेर गरिएको सर्वेक्षणमा डेनमार्कले ८७ नम्बर ल्याएको छ । नेपालले भने ३४ नम्बर ल्याएको छ । अघिल्लो वर्ष ३१ मात्रै ल्याएको थियो ।
विश्वमा सबैभन्दा कम अंक ल्याउने अर्थात् सबैभन्दा बढी भ्रष्टाचार हुने मुलुक सोमालिया रहेको रिपोर्टले देखाएको छ । जसको जम्मा ९ अंक रहेको रिपोर्टले देखाएको छ । ४३ नम्बर आएको खण्डमा भ्रष्टाचार निवारणको अवस्थामा सामान्यतः सन्तोषजनक मानिन्छ । ५० बढी ल्याउँदा भ्रष्टाचार निवारणमा प्रगति भएको मानिन्छ ।
४३ भन्दा कम अंक ल्याउने मुलुकलाई असफल नै भएको मानिन्छ । ट्रान्सपरेन्सी इन्टरनेश्नलका अध्यक्ष खेमराज रेग्मीका अनुसार नेपालमा भ्रष्टाचारको अवस्था नघटेको बताएका छन् ।
अघिल्लो वर्षभन्दा बढी अंक ल्याएको भए पनि व्यवहारमा भ्रष्टाचार नघटेको उनको टिप्पणी छ ।
