गच्छदार विरुद्ध ९ करोड ६५ लाख विगो
दश वर्ष कैद दाबी , सांसदबाट निलम्बित
अख्तीयार दुरुपयोग अनुसन्धान आयोगले बालुवाटार स्थीत ललिता निवासको जग्गा व्यक्तीको नाममा पारेको आरोपमा पूर्व उपप्रधानमन्त्री विजयकुमार गच्छदारसहित १७५ जना विरुद्ध विशेष अदालतमा अभियोग दर्ता गरेको छ ।
अख्तीयारले दायर गरेको मुद्दामा गच्छदारसहित दुई पूर्व मन्त्री र पूर्व सचिवहरु छन् । अख्तियारले पूर्व उपप्रधानमन्त्री गच्छदार, मन्त्री चन्द्रदेव जोशी र डम्बर श्रेष्ठ, अख्तीयार दुरुपयोग अनुसन्धान आयोगका पूर्व प्रमुख आयुक्त दीप बस्न्यात, पूर्वसचिव छविराज पन्त, दिनेशहरि अधिकारी, भाटभटेनी सुपरमार्केटका सञ्चालक मिनबहादुर गुरुङसहित १७५ जना विरुद्ध मुद्दा दायर गरेको हो ।
ललिता निवासको २ सय ९९ रोपनी मध्ये १ सय १४ रोपनी जग्गा हिनामिनाको आरोपमा मुद्दा खेप्ने गच्छदार नेपाली कांग्रेसका उपसभापति पनि हुन् । उनी विरुद्ध ९ करोड ६५ लाख ७६ हजार विगो दाबी गरिएको छ ।
उनी विरुद्धको अभियोग प्रमाणित भएको अवस्थामा गच्छदारले तीन वर्षदेखि दश वर्षसम्म कारागार बस्नुपर्ने हुन्छ । अख्तीयारले भ्रष्ट्राचार निवारण सम्बन्धी ऐन २०५९ को दफा ८ को उपदफा १ र सोही ऐनको दफा ३ को उपदफा १ र सोही उपदफाको (झ) बमोजिम सजाय माग गरेको छ ।
गच्छदार सांसदबाट निलम्बित
भ्रष्टाचारको आरोपमा मुद्दा दर्ता भएपछि कांग्रेस उपसभापति तथा संसदीय दलका उपनेता विजयकुमार गच्छदार सांसदबाट निलम्बित भएका छन् । अख्तियारले विशेष अदालतमा भ्रष्टाचार मुद्दा दायर गरेसँगै गच्छदार प्रतिनिधिसभा सदस्यबाट स्वतःनिलम्बित भएका हुन् ।
गच्छदारको मुद्धामा फैसला नभएसम्म उनी सांसदको हैसियतमा संसद जानबाट बञ्चित हुनेछन् । भ्रष्टाचार मुद्दामा अख्तियारको दाबी अदालतबाट ठहर भएमा गच्छदारले प्रतिनिधिसभाको उम्मेद्वार समेत हुन पाउने छैनन् ।
