काठमाडौं । सर्वोच्च अदालतले पूर्वअधिराजकुमारी प्रेरणा राज्यलक्ष्मी शाहले आफ्नो दावी गरेको काठमाडौंको छाउनीस्थित १५ रोपनी १ आना क्षेत्रफलको घरजग्गा सम्बन्धि रिट सर्वोच्च अदालतले खारेज गरिदिएको छ ।
पूर्वराजा ज्ञानेन्द्र शाह पुत्री प्रेरणाले नेपाल ट्रष्टको जग्गा आफ्नो दाइजो दाबी गर्दै रिट दायर गरेकी थिइन् । प्रधानन्यायाधीश चोलेन्द्रशमशेर राणासहित ५ जनाको संवैधानिक इजलाशले उक्त फैसला गरेको हो ।
यो फैसलासँगै काठमाडौंको छाउनीस्थति १५ रोपनी जग्गा नेपाल ट्रष्टकै हुने भएको छ ।
स्वर्गीय राजा वीरेन्द्र शाह तथा उनको परिवारका सदस्यको नाममा रहेको सम्पत्ति नेपाल ट्रस्टको मातहत ल्याउने भन्दै सरकाले १ पुस २०६४ मा निर्णय गरेको थियो ।
सरकारको उक्त निर्णयअनुसार छाउनीमा रहेको १५ रोपनी जग्गा पनि ट्रस्ट मातहत आएको थियो । तर, ज्ञानेन्द्र शाहकी छोरी प्रेरणाले सरकारले निर्णय गर्नु अगाडि नै आफूले उक्त जग्गा दाइजोमा पाएकाले जग्गा आफ्नो हुने दावी गर्दै सर्वोच्चमा मुद्दा दायर गरेकी थिइन् ।
प्रेरणाको मागदाबीअनुसार सर्वोच्च अदालतका न्यायाधीश रामकुमार साह र न्यायाधीश चोलेन्द्र शम्शेर राणाको इजलाशले उक्त जग्गा नेपाल ट्रस्टको नहुने फैसला सुनाएको थियो ।
तर, नेपाल ट्रस्टले सर्वोच्चको उक्त फैसलाविरुद्ध पुनरावलोकनको निवेदन दिएपछि फैसला उल्टी भएको थियो ।
