वीरगञ्ज । मरिच, केराउ र छोहडाको व्यापारमा संलग्न वीरगञ्जका चर्चित व्यापारीहरू हुन्– सञ्जय अग्रवाल, राजा अग्रवाल र नरेन्द्र अग्रवाल ।
यी व्यापारीसँग धेरै तस्करहरूले सामान खरिद गरी प्रहरीसँगको सेटिङमा भारततर्फ ठूलो मात्रामा मरिच, केराउ र छोहडाको तस्करी गर्दै आएका छन् ।
यसरी तस्करी गर्ने तस्करहरूमा डिनानाथ साह, अमित रौनियार र राजु पटेल पनि प्रमुख हुन् । उनीहरूले नेपाल प्रहरीको इप्रका पोखरियाका निरीक्षक चन्द्रकुमार सिंह र सशस्त्र प्रहरीको पोखरिया बेसका निरीक्षक हरिबहादुर विष्टलाई मोटो रकम दिई तस्करी गराउँदै आएका छन् ।
यी तस्करहरूले अग्रवालहरूबाट खरिद गरेको मरिच, केराउ र छोहडा पोखरियास्थितत सन्तोष साहको घरमा ठूलो मात्रामा गोदाम गर्दै आएका छन् । त्यसपछि दुवै प्रहरीको सेटिङमा तस्करहरूले दैनिकरूपमा १६ देखि २० क्विन्टल सामानहरू पिकअपमार्फत् भारततर्फ तस्करी गराउँदै आएका छन् । राति ३ देखि ६ बजेका बीच उनीहरूले पिकअपमार्फत् यी सामानहरूको भारततर्फ तस्करी गर्दछन् । तराईमा राति बाक्लो हुस्सु लाग्ने भएका कारण भएकाले उनीहरूले राति ३ देखि बिहान ६ बजेको समय उपयुक्त भन्दै त्यही समयमा तस्करी गर्ने गर्दछन् ।
पोखरियाबाट भारतीय सीमा केबल साढे ३ किलोमिटर मात्रै भएका कारण पनि उनीहरूले सहजैरूपमा तस्करी गराउँदै आएका हुन् । अनुकूल हेरेर यी तस्करहरूले कहिले जानकीटोला त कहिले आसवारी र सवेडवा नाकालाई प्रयोग गर्ने गरेका छन् । उनीहरूले स्थानीय चौकीका प्रमुखलाई पनि मासिक रकम दिएर ठूलो मात्रामा तस्करी गर्ने गरेका छन् ।
केही दिनअघिमात्रै तस्करी गराएको अभियोगमा २ नम्बर प्रदेशका प्रहरीका डिआइजी प्रद्युम्न कार्कीले जिप्रका पर्साका घुमुवा सिपाही विजय यादवलाई निलम्बन गरेका छन् । सशस्त्रको पोखरियास्थित बेसक्याम्पका निरीक्षक विष्ट बाहिनीबाट सोझै खटिएका हुन् । नव जनप्रहारबाट ।
