एजेन्सी, १० फागुन । पोर्चुगका फुटबल स्टार क्रिष्टियानो रोनाल्डोका लागि खेल जीवनको आज ऐतिहासिक दिन रहेको छ । ऐतिहासिक दिन यस अर्थमा कि शनिबार राति हुने खेलमा उनी आफ्नो खेल जीवनको १ हजार औं खेल खेल्दैछन् ।
एउटा खेलाडीका लागि लगातार १ हजार खेलको यात्रा आफैंमा ऐतिहासिक मानिन्छ । क्रिस्टियानो रोनाल्डो १ हजार खेल खेल्ने त्यस्ता भाग्यमानी खेलाडी हुन् जो आफैं संसारमा उत्कृष्ट खेलाडीको चर्चामा समेत रहिरहेका छन् ।
समकालीन फूटबलरमा रोनाल्डो र मेस्सीको तुलना हरप्रहर झै भइरह्यो । दुबैको कीर्तिमानी झण्डै झण्डै उस्तै छ । तर गोल संख्या र खेल संख्याका आधारमा मेस्सीभन्दा रोनाल्डो अघि छन् ।
इटालियन सिरी ए फुटबल अन्तर्गत शनिबार राति हुने खेलमा युभेन्टसका रोनाल्डोले जीवनको महत्वपूर्ण खेल खेल्न लागेका हुन् । शनिबार राति युभेन्टसले एसपिएएलसँग प्रतिस्पर्धा गर्दैछ ।
पोर्चुगलका रोनाल्डोले अहिलेसम्म क्लब फुटबलमा ८३५ तथा राष्ट्रिय टिमबाट १६४ खेल खेलेका छन् । उनले अहिलेसम्म समग्रमा ७२४ गोल गरेका छन् ।
रियल मड्रिडका लागि सबैभन्दा बढी ४५० गोल गरेका उनले म्यानचेस्टर युनाइटेडका लागि ११८, पोर्चुगलका लागि ९९, युभेन्टसका लागि ५२ तथा स्पोर्टिङ्गका लागि पाँच गोल गरेका छन् ।
पाँच पटक बालोन डी ओर अवार्ड जितेका रोनाल्डोको खेल जीवनको सुरुवात लिस्बोनको क्लब स्पोर्टिङ्गबाट भएको थियो ।
