काठमाडौं । सदाझैं शिवरात्रीपछि न्यानो हुँदै गएको मौसम अचानक चिसिएको छ । फागुनको दोस्रो साता सकिनै लाग्दा मनसूनमा झैं बादल लागेको छ भने देशका विभिन्न स्थानमा अनपेक्षित असिना पानी समेत परेका समाचारहरु आईरहेका छन् । हप्प गर्मी सुरु हुनेबेलामा तराईका जिल्लामा समेत आगो बालेर चिसो छल्ने उपाय गरिरहेका छन् स्थानीय मानिसहरु । काठमाडौं उपत्यका मंगलबार साँझबाट परेको सिमसिमे वर्षा बुधबार बिहानसम्म पनि जारी थियो ।
पश्चिमी न्यून चापीय वायुको प्रभावका कारण बुधबार देशभर आंशिकदेखि पूर्ण बदली रही देशका केही स्थानमा मेघगर्जन चट्याङसहित वर्षाको सम्भावना रहेको जल तथा मौसम पूर्वानुमान महाशाखाले जनाएको राष्ट्रिय समाचार समितिले जनाएको छ ।
देशको पूर्वी तथा मध्य भूभाग नजिक बनेको न्यून चापीय प्रणाली तथा पश्चिमी वायुको प्रभावले बदलीसँगै वर्षा भइरहेको मौसमविद् समीर श्रेष्ठले जानकारी दिएका छन् । उनले भने, “उक्त वायुको प्रभाव भोलिबाट विस्तारै कम हुँदै जाने छ ।” उपत्यकामा आज दिउँसो मौसम खुले पनि साँझपख वर्षा हुने बताइएको छ ।
पश्चिमी न्यून चापीय प्रणालीको प्रभावले हाल देशका अधिकांश भूभागमा सामान्यदेखि पूर्ण बदली रही देशका मध्य र पूर्वका केही स्थानमा मेघगर्जन चट्याङसहित हल्का वर्षा भइरहेको छ ।
भोलि बिहीबार देशको पश्चिमी भूभागमा सामान्य बदली रही बाँकी भूभागमा मौसम सामान्यतया सफा रहने महाशाखाले जनाएको छ । त्यस्तै शुक्रबार देशको पहाडी भेगमा आंशिक बदली भई बाँकी भूभागमा मौसम सामान्यतया सफा रहने जनाएको छ ।
मौसम पूर्वानुमान महाशाखाको पछिल्लो विवरणअनुसार आज काठमाडौँ उपत्यकाको न्यूनतम तापक्रम छ दशमलव सात र अधिकतम तापक्रम २२ दशमलव शून्य डिग्री सेल्सियस रहेको छ ।
