विराटनगर । कोरोना भाइरसको त्रास फैलिएपछि एक नम्बर प्रदेश सरकारले सम्भावित जोखिम नियन्त्रणका लागि मोरङ र सुनसरीमा क्वारेन्टाइन स्थापना गर्ने भएको छ ।
प्रदेश सरकारले मोरङको लेटाङ नगरपालिकामा पर्ने टाडी र सुनसरीको श्रीलंकाटप्पुमा क्वारेन्टाइन स्थान तयार गर्ने भएको हो । एक नम्बर प्रदेशका मुख्यमन्त्री शेरधन राईले पहिलो चरणमा टाडीमा रहेको सैनिक क्याम्पको जमिन र कोशी नदीका बीचमा रहेको श्रीलंकाटप्पुमा क्वारेन्टाइन स्थापना गर्ने तयारी भएको बताए । आवश्यक परे अन्य क्षेत्रमा पनि क्वारेन्टाइन स्थापना हुनेछ ।
कोरोनाको सम्भावित जोखिमलाई नियन्त्रण गर्न प्रदेश १ ले उच्च सतर्कता अपनाएको मुख्यमन्त्री राईले बताए । कोरोनाको सम्भावित जोखिम नियन्त्रणका लागि प्रदेश सरकारले बिहीबार सर्वपक्षीय छलफल आयोजना गरेको थियो । छलफलपछि मुख्यमन्त्री राईले कोरोनाको सम्भावित जोखिम नियन्त्रणका लागि सरकार केन्द्रित भएको बताए ।
प्रदेश सरकारले कोरोना भाइरस भित्रिए संक्रमितको उपचारमा खटिने स्वास्थ्यकर्मी र सुरक्षाकर्मीलाई पोशाक र अतिरिक्त भत्ता दिने निर्णय गरेको छ । कोरोनाको सम्भावित जोखिम नियन्त्रणका लागि सीमा क्षेत्रमा र विमानस्थलहरूमा हेल्प डेस्क स्थापना गर्ने र शंकास्पद विरामीलाई क्वारेन्टाइनमा राखिने एक नम्बर प्रदेशका सामाजिक विकासमन्त्री जीवन घिमिरेले जानकारी दिए ।
