काठमाडौं, २६ चैत । कोरोना भाइरस (कोभिड–१९) विरुद्ध अग्रमोर्चामा रहेर काम गर्ने स्वास्थ्यकर्मी यो परिस्थितिमा सबैभन्दा जोखिममा रहेको सर्वविदितै छ । यद्यपी उनीहरुले उपचार गर्नुको विकल्प पनि नभएकाले कोरोनासँगको लडाइँमा चिकित्सकलाई अग्रमोर्चाको सिपाइ नै मानिएको छ ।
त्यसमाथि पर्सनल प्रोटेक्भिट इक्युपमेन्ट (पीपीई) लगायतका सुरक्षा किटको अभाव अझै टरेको छैन । तैपनि जोखिम मोलेर स्वास्थ्यकर्मीहरु कार्यक्षेत्रमा खटिइरहेका छन् । सरकारले पनि सुरक्षा सामाग्री जुटाउन प्रयास गरिरहेको छ भने शतप्रतिशत भत्ता दिनेदेखि २५ लाखसम्मको जीवन बीमा गर्ने निर्णय गरेको छ ।
तर धरान उपमहानगरपालिकाले भने राहत बाँड्नका लागि भन्दै तिनै स्वास्थ्यकर्मीसँग तलब मागेको छ । मेयर तिलक राई आफैंले बीपी कोइराला स्वास्थ्य विज्ञान प्रतिष्ठान, धरानका उपकुलपतिलाई पत्र लेखेर प्रतिष्ठानमा कार्यरत डाक्टर लगायतका कर्मचारीको १० दिनको पारिश्रमिक राहत कोषमा उपलब्ध गराउन आग्रह गरेका हुन् ।
धरानका प्रमुख प्रशासकीय अधिकृत विदुरप्रसाद खनालले स्वास्थ्यकर्मीलाई कोषमा रकम जम्मा गर्न आग्रह गर्दै पत्र पठाएको स्वीकार गरे । उनले भने, ‘अनिवार्य भनेको होइन, अनुरोध चाहिँ सबैलाई गरेका हौं ।’
