काठमाडौं- काठमाडौंकाे पेप्सीकोलामा एकै परिवारका तीन जनामा र्यापिड टेष्ट किटबाट गरिएको कोरोना परीक्षण पोजेटिभ देखिएको छ ।
हालै बेलायतबाट फर्किएका उनीहरुमा र्यापिड टेष्ट किटबाट गरिएको कोरोना परीक्षणको रिपोर्ट पोजेटिभ देखिएको हो । उनीहरुमा कोरोनाको संक्रमण देखिएपछि पाटन अस्पतालको आइसोलेशनमा भर्ना गरिएको छ ।
अस्पतालका निर्देशक डाक्टर विष्णु शर्माका अनुसार र्यापिड टेष्ट किटबाट कोरोना परीक्षण गर्दा पोजेटिभ देखिएपछि उनीहरुलाई पाटन अस्पतालको आइसाेलेशनमा राखिएको हो ।
अस्पतालले थ्रोड स्वाब संकलन गरी पीसीआर विधिबाट पुनः परीक्षण गर्न लागेको अस्पतालका निर्देशक शर्माले बताए । डा शर्माका अनुसार उनीहरु केही समय अगाडि बेलायतबाट नेपाल आएका हुन्।
उनीहरुमा र्यापिड टेष्ट किटबाट कोरोना परीक्षण पोजेटिभ देखिएपछि अहिले उनीहरु बसेको पेप्सीकोलास्थित सनसिटी अपार्टमेन्ट सील गरिएको छ । सो क्षेत्रमा प्रहरीले उच्न निगरानी समेत बढाएको छ ।
अहिले प्रहरीले अपार्टमेन्ट भित्रबाट बाहिर र बाहिरबाट भित्र जान दिएको छैन ।
प्रहरी डीआईजी विश्वराज पोखरेलका अनुसार अहिले प्रहरीले उक्त भवनमा सिल गरेको छ । पोखरेलका अनुसार उनीहरु तीन जना गत चैत ५ गते बेलायतबाट आएको थाहा भएको छ ।
