उर्लाबारी । उर्लाबारी नगरपालिका विपद राहत कोषमा संघीय लिम्बूवान मञ्च नेपाल उर्लाबारी नगर समितिले ३० हजार रुपैयाँ सहयोग गरेको छ ।
आज मञ्चका नगर अध्यक्ष बरुण लाबुङले उर्लाबारी नगरपालिकाका मेयर खड्ग फागोलाई सो रकम हस्तान्तरण गर्नुभएको हो ।
पार्टीको तर्फबाट २० हजार र मोरङ जिल्ला सचिवालय सदस्य रामकुमारी लिम्बूले १० हजार गरी नगद ३० हजार रुपैयाँ सहयोग गरेको मञ्चका नेता हरिराज खिम्दिङले जानकारी दिनुभयो । कोरोना भाइरसको संक्रमण फैलिन नदिन सरकारले गरेको लकडाउनमा दैनिक मजदुरी गरी जिविकोपार्जन गर्दै आएका परिवारलाई राहत वितरणमा सहज होस् भनेर सहयोग गरेको अध्यक्ष लाबुङले जानकारी दिनुभयो । त्यस्तै, उर्लाबारीका शिक्षासेवी मानबहादुर फागोले २ सय ५० केजी चामल, ५ लिटर तेल र १० केजी दाल सहयोग गर्नुभएको छ । त्यस्तै, शाक्य लाखेजात्रा उर्लाबारीबाट नगद १० हजार रुपैयाँ सहयोग प्राप्त भएको छ ।
