विश्वभर फैलिएको कोरोना भाइरस (कोभिड १९) को संक्रमणका कारण यतिबेला नेपाल पनि लकडाउनमा छ । यो भाइरसको संक्रमण फैलिन नदिन सरकारले बैशाख १५ गतेसम्मलाई लकडाउन गरेको छ । कोरोनाको त्रासले एक महिनायता नेपाली चलचित्रको छायांकनदेखि प्रदर्शनसम्म स्थगित हुँदा कलाकारहरु पनि लक डाउनका कारण घर भित्रै छन् । कलाकारहरु कोही आफ्नो परिवारसंग समय बिताइरहेका छन् भने कोही श्रीमान् वा श्रीमतीसँग खाना पकाइरहेका छन् , कोही किताब पढ्दै, चलचित्र हेर्दै बसेको देख्न सकिन्छ ।
यसैक्रममा अभिनेता आर्यन सिग्देल लकडाउनको समय खेतमा काम गरेर सदुपयोग गरिरहेका छन् । लामो समयदेखि काठमाडौंमा बस्दै आएका उनी श्रीमती र छोरासहित लकडाउनपछि थानकोट फर्किएका हुन् । त्यहाँ उनको आमा-बुबा बस्ने गर्दछन् । उनले बिहीवार आफ्नो आधिकारिक इन्स्टाग्राममा आमासँग खेतमा काम गर्दै गरेको तस्विर साझेदार गरेका छन् । उनी कुटोले तरकारी रोप्नका लागि खेत खन्दै गरेको देख्न सकिन्छ । तस्विरमा छेवैमा उनकी आमा पनि छिन् ।
