मङ्लबार, बैशाख ९, २०७७
चितवन । लकडाउनको बेला नेपाल साल्ट ट्रेडिङ कर्पोरेसनसँग अझै १० महिनालाई पुग्ने नुन स्टकमै छ । साल्ट ट्रेडिङले १६० मेट्रिक टन नुन स्टकमै राखेको छ । उक्त नुनको मात्राले नेपालमा १० महिना पुग्छ ।
‘स्टकको चिनी कम हुँदै गइरहेको छ, पिरोलो चिनीको हो’, नेपाल साल्ट ट्रेडिङ कर्पोरेसनका बजार व्यवस्थापक ब्रिजेश झाले भने । उनका अनुसार चिनी खुद्रामा बेचबिखन गरे पनि एक/डेढ महिना मुस्किलले पुग्ला, तर त्यति दिनलाई पुग्न पनि गाह्रो छ । नेपालमा मासिक औसतमा २० हजार मेट्रिक टन चिनी चाहिन्छ । यतिबेला साल्ट ट्रेडिङसँग जम्मा छ हजार मेट्रिक टन चिनीमात्रै स्टकमा छ ।
साल्ट ट्रेडिङ चितवनका प्रमुख बुद्धिविनोद दाहालले नुनको पिरोलो नभए पनि चिनीको पिरोलो बढी भएको बताए । उनी खुद्रा क्रेतालाई चिनीको अभाव हुन नदिने बताउँछन् । साल्ट ट्रेडिङ चितवनद्वारा एक उपभोक्ताबराबर बढीमा ६ किलोसम्म चिनी वितरण गरिएको प्रमुख दाहाल बताउँछन् । उनी भन्छन्, ‘लकडाउन भएदेखि नै बोराका दरले चिनी दिएका छैनौँ, स्टक कम हुँदै गएकाले एक उपभोक्तालाई बढीमा ६ किलोभन्दा बढी दिन सकिँदैन ।’
प्रमुख दाहालले भने, ‘अहिले हामीसँग १३० बोरा चिनी छ, यसले कहिलेसम्म धान्न सक्छ हेरौँ !’ साल्ट ट्रेडिङ चितवनले प्रतिकिलो ७३ रुपैयाँमा चिनी बिक्री गरिरहेको छ । बजारमा चिनी थोकमा प्रतिकिलो ७६ र खुद्रामा ८० रुपैयाँसम्म विक्री भइरहेको छ । किराना व्यवसायी संघ चितवनले बजारमा चिनीको अभाव नभएको जनाएको छ ।
संघका अध्यक्ष रवीन्द्रकुमार श्रेष्ठले बजारमा अहिले नै चिनीको अभाव नभएको बताए । गत आर्थिक वर्षमा सरकारले चिनी आयातमा प्रतिबन्ध लगाएको थियो । यसवर्ष सरकारले साल्ट टे«डिङलाई १० हजार मेट्रिक टन आयात गर्न स्वीकृति दिएको थियो ।by चितवन पोष्ट
