बैशाख १२, २०७७
काठमाडौँ । प्रमुख प्रतिपक्षी दल नेपाली कांग्रेसको भातृ संगठन नेपाल विध्यार्थी संघ (नेविसंघ) ले सरकारले ल्याएका अध्यादेशको बिरोधमा देशभर प्रदर्शन गरेको छ । नेबिसंघले शुक्रवार बिहान ९ बजेबाट १० मिनेट देशभर बिधेयक फिर्ताको माग गर्दै विरोध प्रदर्शन गरेको हो ।
अध्यक्ष राजीब ढुंगानाले सोमबार सरकारले ल्याएका दुबै अध्यादेश फिर्ताको माग गर्दै देशैभर प्रदर्शन गरिएको जानकारी दिए । उनका अनुसार ५-५ जनाले सामाजिक दूरी कायम गरेर कालो झण्डासहित नेबिसंघले प्रदर्शन गरेको हो ।
सरकारले हालै मात्र राजनीतिक दल विभाजन खुकुलो बनाउने र प्रतिपक्षी दलको नेता उपस्थित नहुँदा पनि बैठक बसी निर्णय गर्न सक्ने गरी संवैधानिक परिषद् सम्बन्धी अध्यादेश ल्याएको छ ।
लोकतन्त्र समाप्त पार्ने नियतका साथ अध्यादेश ल्याइएको भन्दै नेविसंघ महामन्त्री दिपक भट्टराईले विरोधमा उत्रिनु परेको बताए ।
राष्ट्रीय संकटको घडीमा जनतालाई घरमा थुनेर संविधानको भावना र मर्म विपरीत लोकतन्त्र समाप्त पार्ने नियतका साथ ल्याइएका अध्यादेश फिर्ता नभए नेविसंघले आन्दोलनलाई थप सशक्त बनाउने उनले चेतावनी दिए ।
दुवै अध्यादेश ल्याउनु सनक र सत्ता राजनीतिको अत्यन्तै घृणित खेल भएको भन्दै नेविसंघले आन्दोलन थालेको महामन्त्री बलदेव तिमल्सिनाले जानकारी दिए । यस्तै नेविसंघले काठमाडौं उपत्यकासहित देशभर प्रदर्शन थालेको नेविसंघका अर्का महामन्त्री युवराज पाण्डेले बताए ।
पाण्डेले सरकारले ल्याएका विधेयकहरू तत्काल फिर्ता गर्न दवाव दिने उद्देश्यले सामाजिक दुरी कायम गरी, स्वास्थ्य सावधानी अपनाउदै, भिडभाड नगरी सांकेतिक विरोध कार्यक्रम गरेको जनाए ।
कोरोना महामारी रोकथाम गर्नु पर्नेबेलामा देशमा अस्थिरता ल्याउन अधिनायकवादउन्मुख भएर विधेयक ल्याइएकोले विरोध प्रदर्शन गरिएको नेविसंघले जनाएको छ ।
